Almatyda qurylys kompanıalaryna qatysty keń aýqymdy tekseris bastaldy,birneshe merdiger mekeme óreskel zańbuzýshylyqtar úshin lısenzıasynan aıyryldy, dep habarlaıdy Dalanews.kz.
Birneshe kompanıanyń lısenzıasy toqtatyldy
Atap aıtqanda, Ábish Kekilbaıuly kóshesindegi káriz júıesin qaıta jańartý jumystaryn júrgizgen AsiaMax JSHS qurylys lısenzıasynan aıyryldy.
Sondaı-aq «SK 7 stroı» JSHS de lısenzıasyz qaldy. Bul merdiger bir ýaqytta birneshe nysanda jumys istep kelgen: №112 mektep ǵımaratyna qosymsha qurylys júrgizip, Áýezov aýdanyndaǵy birqatar nysandardy abattandyrýmen aınalysqan.
«Barlyq nysan boıynsha jospardan tys tekserýler júrgizildi. Nátıjesinde qurylys-montaj jumystary kezinde jobalyq sheshimderden aýytqý jáne qurylys salasyndaǵy memlekettik normatıvterdiń talaptaryn saqtamaý faktileri anyqtaldy», - delingen resmı habarlamada.
Sonymen qatar, №174 mektep-gımnazıa ǵımaratyna qosymsha qurylys júrgizý nysanynda da jospardan tys tekserý júrgizilip, jobadan aýytqýlar men normatıvtik talaptardyń buzylýy tirkeldi. Bul jumysty «Qurylysshy – TBS» JSHS oryndaǵan.
«Atalǵan merdigerge qatysty ákimshilik sharalar qabyldanyp, qurylys lısenzıasynyń bir tarmaǵynan aıyrý týraly sheshim qabyldandy», - dep habarlady basqarma ókilderi.
Daýdan keıin bastalǵan tekserýler
Qalalyq qala qurylysy baqylaý basqarmasynyń málimetinshe, Almaty ákimi Darhan Satybaldynyń tapsyrmasymen qurylys nysandaryna qatysty tekserýler kúsheıtilgen. Basqarma ókilderi anyqtalǵan árbir zańbuzýshylyq boıynsha tıisti sharalar qabyldanatynyn atap ótti.
