Tanymal ekonomikalyq sarapshy Iýrii Masanov Facebook áleýmettik jelisindegi óziniń paraqshasynda otandyq metallýrgiiadaǵy ózekti másele — mys kontsentratyn bastapqy óńdeý men balqytý aqysynyń tarifin belgileý ádistemesine qatysty óz pikirin bildirdi. Sarapshynyń aitýynsha, jahandyq naryqtaǵy ýaqytsha teńgerimsizdikten qalyptasqan álemdik kórsetkishterdi Qazaqstannyń ishki naryǵyna soqyr kóshirý ulttyq óńdeý ónerkásibiniń damýyn shekteýi múmkin, dep habarlaidy Dalanews.kz.
Taldaýshy búgingi tańda álemdik kórsetkishterdiń nóldik nemese teris deńgeige deiin tómendeýi óńdeý protsesiniń tegin bolǵanyn bildirmeitinin, bul tek Qytaidaǵy balqytý qýattylyqtarynyń shamadan tys artýy men shikizat tapshylyǵy saldarynan týyndaǵan ýaqytsha koniýnktýra ekenin atap ótti. Ishki tarifti anyqtaý kezinde naryqtyq baǵa men óndiristiń naqty fizikalyq ekonomikasyn ajyrata bilý qajet.
«Jahandyq TS nólge tómendegenimen, bul qaita óńdeý tegin boldy degendi bildirmeidi, sondyqtan ony otandyq metallýrgiianyń uzaqmerzimdi baǵdary retinde qabyldaýǵa bolmaidy», — dep atap ótti Masanov.
Sonymen qatar sarapshy altyn, kúmis jáne kúkirt qyshqylyn bólip alýdan túsetin tabysty avtomatty túrde óńdeý tarifinen shegerip tastaý ekonomikalyq turǵydan burys ekenin alǵa tartady. Mundai mehanizm zaýyttardy óndiristi jańǵyrtýǵa jáne tereń qaita óńdeýge investitsiia salýdan taisalanýǵa ákep soǵady, bul ásirese metall bólip alý koeffitsienti 95-96 paiyzdy quraityn qazaqstandyq kásiporyndar úshin óte mańyzdy.
Osyǵan bailanysty Iýrii Masanov mys tarifin retteý saiasaty shikizat óndirýshiler men óńdeýshiler arasyndaǵy teńgerimdi saqtap, ishki óndiristi odan ári damytýǵa yntalandyrýy tiis ekenin aitty:
«Kásiporyn shikizat komponentterin neǵurlym tiimdi bólip alyp, ony tereńirek qaita óńdegen saiyn, onyń negizgi kaita óńdeý aqysy tómendeitin bolsa, bul konstrýktivti tásil emes. Bul tereń qaita óńdeýge investitsiia salýdy yntalandyrmaidy, kerisinshe shekteidi».
