Túrkistan oblysy, Tólebi aýdanynda Uly Jeńistiń 80 jyldyǵyna orai saltanatty jiyn ótti,- dep habarlaidy Dalanews.kz
Merekelik is-shara aýdan ortalyǵynda ornalasqan "Jeńis" saiabaǵyndaǵy máńgilik alaýǵa gúl shoqtaryn qoiýdan bastaldy.
Óńir basshysy Erkeǵali Álimqulov, aýdandyq máslihat tóraǵasy Nurlan Qoibaǵarov, ardagerler keńesi, qoǵamdyq keńes tóraǵalary, aýdandaǵy ziialy qaýym ókilderi qatysyp, babalar rýhyna taǵzym etildi. Bir minýt únsizdik jariialanyp, quran baǵyshtaldy.
Sondai-aq, aýdandyq Mádeniet úiinde ótken saltanatty jiynda aýdan ákimi Erkeǵali Amantaiuly tyl eńbekkerlerine merekelik medal tabystap, jeńis merekesimen quttyqtady.
«Búginde ortamyzda qalmaǵan Uly Otan soǵysy ardagerleri men qatary sirep bara jatqan tyl ardagerleriniń erligi men qaisarlyǵy urpaq jadynda máńgi saqtalady. Olar bizge beibit ómir men jarqyn bolashaq syilady. Sol surapyl soǵystaǵy árbir jankeshtilik — búgingi urpaq úshin taǵylym men tálim. Ardagerlerimizdiń erligi men eńbegi — máńgilik ónege, óshpes úlgi. Jyl saiyn osynaý Jeńis kúnin atap óte otyryp, biz sol surapyl soǵysta qaza taýyp, halqy úshin qurban bolǵan jaýyngerlerdiń esimderin ardaqtap, ardagerlerimizdi ulyqtaimyz, qurmetpen eske alamyz. Bul bizdiń perzenttik paryzymyz»- dedi quttyqtaý sózinde aýdan ákimi.
Merekelik is-sharada patriottyq ánder shyrqalyp, jinalǵandarǵa rýh pen kóterińki kóńil-kúi syilady.
