Qazaqstan Premer-ministri Oljas Bektenov pen Grýziia Premer-ministri Iraklii Kobahidze joǵary deńgeide qol jetkizilgen ýaǵdalastyqtardy júzege asyrý máselelerin talqylady, dep habarlaidy dalanews.kz.
Kezdesý barysynda saýda-ekonomikalyq, investitsiialyq, kólik-logistika, energetika jáne tsifrlandyrý salalaryndaǵy yntymaqtastyq máseleleri qaraldy. Taraptar sondai-aq birlesken ekonomikalyq jobalardy júzege asyrý jáne jasandy intellekt baǵytyndaǵy áriptestikti damytýǵa erekshe nazar aýdardy.
«Qazaqstan Úkimeti Grýziiamen ózara tiimdi yntymaqtastyqty odan ári tereńdetýge daiyn. Sizdiń resmi saparyńyz qazaq-grýzin qatynastarynyń qarqyndy damyp kele jatqanyn, saiasi dialogtyń joǵary deńgeiin jáne ózara senimdi kórsetedi. Qazaqstan Grýziiany Ońtústik Kavkaz ben Qara teńiz óńirindegi senimdi dosy ári strategiialyq seriktesi retinde qarastyrady», – dedi Oljas Bektenov.
Óz kezeginde Iraklii Kobahidze Qazaqstandy Grýziianyń negizgi seriktesteriniń biri ekenin atap ótti.
«Qazaqstan – Grýziia úshin negizgi seriktesterdiń biri. Strategiialyq áriptestik ornatý ekijaqty yntymaqtastyqty keńeitýge jańa múmkindikter ashyp otyr. Biz barlyq baǵyt boiynsha ózara bailanysty damytýǵa múddelimiz», – dedi Grýziia Premer-ministri.
Kezdesýde buǵan deiin Memleket basshysy Qasym-Jomart Toqaev pen Iraklii Kobahidze arasynda qol jetkizilgen kelisimderdi iske asyrý máselesine erekshe nazar aýdaryldy.
Kelissóz qorytyndysynda eki el úkimeti strategiialyq seriktestikti odan ári nyǵaitýǵa jáne praktikalyq yntymaqtastyqty keńeitýge daiyn ekenin rastady.
Úkimet málimetinshe, 2025 jyldyń qorytyndysynda Qazaqstan men Grýziia arasyndaǵy taýar ainalymy 184,5 mln AQSh dollaryn quraǵan. Al 2026 jyldyń qańtar–sáýir ailarynda bul kórsetkish 53 mln dollar boldy. Qazir Qazaqstanda grýzin kapitalynyń qatysýymen 600-den astam kompaniia jumys isteidi, taǵy 14 uiym «Astana» halyqaralyq qarjy ortalyǵynda tirkelgen.
