Politsiia azamattardy kóshedegi kúmándi QR kodtardy skanerleýden aýlaq bolýǵa shaqyrdy. Mamandardyń aitýynsha, alaiaqtar bul tehnologiiany adamdardyń jeke málimetin urlaý úshin jii paidalanyp júr, dep habarlaidy dalanews.kz.
IIM málimetinshe, qaskóiler aialdamalarda, kirberiste, jarnama taqtalary men basqa da qoǵamdyq oryndardaǵy túpnusqa QR kodtardyń ornyna jalǵan kod japsyrady. Olardy skanerlegen adam alaiaqtardyń saityna ótip, ózi baiqamai jeke deregin nemese bank kartasynyń málimetin engizip qoiýy múmkin. Kei jaǵdaida tólem jasaǵan aqsha da qylmyskerlerdiń esepshotyna túsedi.
Politsiia kúmándi QR kodtardy birneshe belgi arqyly ajyratýǵa bolatynyn aitty. Máselen, kod basqa jarnamanyń ústine japsyrylýy, uiymnyń ataýy men bailanys deregi kórsetilmeýi nemese "Syilyq alyńyz", "Tek búgin", "Jedel skanerleńiz" degen siiaqty asyqtyratyn mátinder bolýy kúdik týdyrýǵa tiis.
Osyǵan bailanysty azamattarǵa belgisiz QR kodtardy skanerlemeý, ashylǵan siltemeniń mekenjaiyn muqiiat tekserý, kúmándi saittarǵa jeke jáne bank deregin engizbeý, sondai-aq, belgisiz qosymshalardy ornatpaýǵa keńes berildi.
Politsiia turǵyndardy qyraǵylyq tanytyp, internet alaiaqtardyń arbaýyna túspeýge shaqyrdy.
