Úlken Naryn aýylynda ótken kóshpeli ákimdik otyrysynda Shyǵys Qazaqstan oblysynyń ákimi Nurymbet Saqtaǵanov aýdannyń damýynyń negizgi baǵyttaryn talqylady. Ásirese, bilim berý, turǵyn úi-kommýnaldyq sharýashylyǵy, jol infraqurylymy jáne týrizm máselelerine erekshe kóńil bólindi.
Týristik tartymdylyqty arttyrý baǵytyndaǵy bir qadam – Úlken Naryn mańynda jańa jol boiy servistik nysannyń ashylýy boldy. Keshende ekspress-kafe, kúndelikti qajetti taýarlary bar dúken, sanitarlyq aimaqtar, ana men bala bólmesi jáne namaz oqýǵa arnalǵan bólme bar.
Nurymbet Saqtaǵanovtyń aitýynsha, mundai nysandar respýblikalyq joldar boiynda árbir 50–60 shaqyrym saiyn ornatylady. Biyl oblysta taǵy 870 km jol jóndelmek, al byltyr 710 km jol jańartylǵan.
Sondai-aq, sońǵy alty jylda alǵash ret Úlken Naryn aýylynda jylytý maýsymy turaqty ótti — turǵyn úilerdegi temperatýra 26 gradýsta saqtaldy. Bul nátijege aýqymdy daiyndyq arqasynda qol jetkizildi: jylý jelilerin jóndeýge 404 mln teńge bólindi, bul ótken jylmen salystyrǵanda on ese kóp.
Basqa infraqurylymdyq máseleler de sheshilýde. Kókterek jáne Malonaryn aýyldarynda sý qubyry jelileri kúrdeli jóndeýden ótti. Endi bul eldi mekenderdiń turǵyndary tolyqtai ortalyqtandyrylǵan aýyz sýmen qamtamasyz etildi. Úlken Narynnyń ózinde de sý júiesin jańartý jumystary jalǵasýda.
Aita ketý kerek, Shyǵys Qazaqstan oblysynda UBT ótkizýge arnalǵan eki ortalyq jumys isteidi — Óskemen qalasynda jáne Úlken Naryn aýylynda. Zaisanda úshinshi ortalyq ashý máselesi áli kelisý satysynda tur.
