Búginde Qazaqstanda elektrondy úkimetti qalyptastyrýdyń naqty nátıjeleri qyzmet túrin tutynýshylarǵa ýaqyt únemdeýge, keıbir jaǵdaılarda jolaqysyna jumsalatyn qarajat únemdeýge múmkindik týǵyzyp otyr. Memlekettik qyzmetshi tarapynan bolatyn yqtımal sybaılastyq, dórekilik, qarymta aqy suraý syndy keleńsizdikterdiń jolyn bógeýge septigin tıgizip, qyzmet kórsetý úderisin birshama jeńildetip otyrǵandyǵy da aıdan anyq. Osy kúni jetildirilip, jańa sapalyq deńgeıge kóterilgen qyzmetterge «Elektrondyq Úkimet» baǵdarlamasynyń aıasynda birqatar sharalar júzege asyrylýda.
At aryltyp, mekemelerdiń tabaldyryǵyn tozdyratyn zaman ótti. Endigi kezekte, kez kelgen azamat óz úıinde ınternet arqyly qajetti anyqtamany aldyrýǵa múmkindigi bar. Áıtse de, atalǵan qyzmet túrin ınternet júıesi arqyly paıdalaný úshin tutynýshy mindetti elektrondyq qujatqa qol jetkizýi kerek.
«Elektrondyq úkimet» (e-Government) termıni barlyq memlekettik organdardyń basyn biriktirip, olarǵa ınternettiń, elektrondy termınaldardyń nemese tipti uıaly telefondardyń kómegimen turǵyndarǵa qyzmet kórsetýge múmkindik beretin birtutas júıesi bolyp tabylady. Baǵdarlamanyń jeke tulǵalarǵa ǵana emes, zańdy tulǵalar men kásipkerlerge de qatysy bar.Elektrondyq qujat degenimiz árbir elektrondy qyzmet túrin tutynýshynyń ınternet júıesine tirkelip, jeke elektrondyq kilt alyp, elektrondyq qoltańbasyn tirkeýi bolyp tabylady. Elektrondy kilt alý úshin jeke tulǵa óziniń jeke kýáligimen qyzmet kórsetý ortalyǵyna kelip, suranym berýi kerek.
