Jumys tobynyń ókilderi, Taldyqorǵan qalalyq bilim bóliminiń, oblystyq Jastarǵa qyzmet kórsetý men «Til» oqý ádistemelik ortalyǵynyń qyzmetkerleri, sondai-aq Astanadan arnaiy kelgen «Attila Group» kompaniiasynyń ókili Bilál Qýanysh qatysqan jiyndy oblys ákiminiń orynbasary Jaqsylyq Omar ashyp, júrgizdi.
– Latyn álipbiine kóshý keshe nemese búgin qozǵap júrgen másele emes. Osydan birneshe jyl buryn Elbasy bul máseleni bizdiń aldymyzǵa maqsat etip qoiǵan bolatyn. Jalpy, bul qazaq halqynyń latyn álipbiine kóshýi emes, latyn álipbiine oralýy dep aitsaq bolady. Sebebi ata-babalarymyzdyń ózi latyn álipbiin qoldanyp kelgen. Bul tarihymyzda bar derek, basymyzda bar tájiribe. Dál qazirgi ýaqytta jastarymyzdyń basym bóligi áleýmettik jelilerdegi, telefondaǵy SMS habarlamalaryn jazýda latyn qarpin qoldanyp júr. Sondyqtan, latyn qarpine kóshý eshqandai qiyndyq týdyrmasy anyq, – degen Jaqsylyq Muqashuly bizdiń oblystyń latyn qarpine kóshýge qashan da daiyn ekendigin aitty.
Munan keiin sóz «Qamshy» portalynyń jetekshisi, «Attila Group» kompaniiasynyń ókili Bilál Qýanyshqa berildi. Óz sózinde ol «Qazlatyn.kz» atty qarip aýystyrý konverterin tanystyryp, onyń erekshelikterin de atady. Onyń aitýynsha, mamandarymyz on jyldan beri zerttep keletin qazaq álipbileriniń konverter júiesi osy kúnge deiin álem qazaqtary paidalanyp kelgen kirill, latyn, tóte jazýlardy bir-birine qateliksiz aýdara alatyn biregei júie. Tóte jazýmen oqityn Qytai qazaqtary da, latyn álipbiimen oqityn Eýropa qazaqtary da osy konverter arqyly jańa álipbidegi málimetti oqi alady deidi.
Osy tusta aita ketsek, Bilál Qýanysh óz konverterin osy aidyń basynda Májiliste ótken «Memlekettik tildiń latyn grafikasyndaǵy álipbiiniń biryńǵai standartyn engizý máseleleri týraly» parlamenttik tyńdaý kezinde tanystyrǵan edi.
Dóńgelek ústelde sóz etilgen máseleler boiynsha oblystyq bilim basqarmasy basshysynyń orynbasary Gúlsara Isaǵulova, oblystyq óńirlik kommýnikatsiialar qyzmetiniń bólim basshysy Daniiar Janys, Abai atyndaǵy №1 mektep-gimnaziiasynyń qazaq tili men ádebieti pániniń muǵalimi Botagóz Súigenbaevalar da óz oilaryn ortaǵa saldy.
Jiynǵa qatysýshylar tarapy kelgen qonaqtarǵa kókeide júrgen saýaldaryn qoiyp, tushymdy jaýap aldy.
