تالدىقورعاندا ءتىل  سارايىندا الماتى وبلىسىنىڭ تىلدەردى دامىتۋ جونىندەگى باسقارماسى جانە وبلىستىق وڭىرلىك كوممۋنيكاسيالار قىزمەتىنىڭ ۇيىتقى بولۋىمەن  «لاتىن ءالىپبيى: تەحنيكالىق مۇمكىندىكتەر» اتتى دوڭگەلەك ۇستەل ءوتتى.
جۇمىس توبىنىڭ وكىلدەرى، تالدىقورعان قالالىق ءبىلىم ءبولىمىنىڭ، وبلىستىق جاستارعا قىزمەت كورسەتۋ مەن «ءتىل» وقۋ ادىستەمەلىك ورتالىعىنىڭ قىزمەتكەرلەرى، سونداي-اق استانادان ارنايى كەلگەن «Attila Group» كومپانياسىنىڭ وكىلى ءبىلال قۋانىش قاتىسقان جيىندى وبلىس اكىمىنىڭ ورىنباسارى جاقسىلىق ومار اشىپ، جۇرگىزدى.
– لاتىن الىپبيىنە كوشۋ كەشە نەمەسە بۇگىن قوزعاپ جۇرگەن ماسەلە ەمەس. وسىدان بىرنەشە جىل بۇرىن ەلباسى بۇل ماسەلەنى ءبىزدىڭ الدىمىزعا ماقسات ەتىپ قويعان بولاتىن. جالپى، بۇل قازاق حالقىنىڭ لاتىن الىپبيىنە كوشۋى ەمەس، لاتىن الىپبيىنە ورالۋى دەپ ايتساق بولادى. سەبەبى اتا-بابالارىمىزدىڭ ءوزى لاتىن ءالىپبيىن قولدانىپ كەلگەن. بۇل تاريحىمىزدا بار دەرەك، باسىمىزدا بار تاجىريبە. ءدال قازىرگى ۋاقىتتا جاستارىمىزدىڭ باسىم بولىگى الەۋمەتتىك جەلىلەردەگى، تەلەفونداعى سمس حابارلامالارىن جازۋدا لاتىن ءقارپىن قولدانىپ ءجۇر. سوندىقتان، لاتىن قارپىنە كوشۋ ەشقانداي قيىندىق تۋدىرماسى انىق، – دەگەن جاقسىلىق مۇقاش ۇلى ءبىزدىڭ وبلىستىڭ لاتىن قارپىنە كوشۋگە قاشان دا دايىن ەكەندىگىن ايتتى.
مۇنان كەيىن ءسوز «قامشى» پورتالىنىڭ جەتەكشىسى، «Attila Group» كومپانياسىنىڭ وكىلى ءبىلال قۋانىشقا بەرىلدى. ءوز سوزىندە ول «Qazlatyn.kz» اتتى ءقارىپ اۋىستىرۋ كونۆەرتەرىن تانىستىرىپ، ونىڭ ەرەكشەلىكتەرىن دە اتادى. ونىڭ ايتۋىنشا، ماماندارىمىز ون جىلدان بەرى زەرتتەپ كەلەتىن قازاق الىپبيلەرىنىڭ كونۆەرتەر جۇيەسى وسى كۇنگە دەيىن الەم قازاقتارى پايدالانىپ كەلگەن كيريلل، لاتىن، توتە جازۋلاردى بىر-بىرىنە قاتەلىكسىز اۋدارا الاتىن بىرەگەي جۇيە. توتە جازۋمەن وقيتىن جۇڭگو قازاقتارى دا، لاتىن الىپبيىمەن وقيتىن ەۋروپا قازاقتارى دا وسى كونۆەرتەر ارقىلى جاڭا الىپبيدەگى مالىمەتتى وقي الادى دەيدى.
وسى تۇستا ايتا كەتسەك، ءبىلال قۋانىش ءوز كونۆەرتەرىن وسى ايدىڭ باسىندا ماجىلىستە وتكەن «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋ كەزىندە تانىستىرعان ەدى.
دوڭگەلەك ۇستەلدە ءسوز ەتىلگەن ماسەلەلەر بويىنشا وبلىستىق ءبىلىم باسقارماسى باسشىسىنىڭ ورىنباسارى گۇلسارا يساعۇلوۆا، وبلىستىق وڭىرلىك كوممۋنيكاسيالار قىزمەتىنىڭ ءبولىم باسشىسى دانيار جانىس، اباي اتىنداعى №1 مەكتەپ-گيمنازياسىنىڭ قازاق ءتىلى مەن ادەبيەتى ءپانىنىڭ ءمۇعالىمى بوتاگوز سۇيگەنبايەۆالار دا ءوز ويلارىن ورتاعا سالدى.
جيىنعا قاتىسۋشىلار تاراپى كەلگەن قوناقتارعا كوكەيدە جۇرگەن ساۋالدارىن قويىپ، تۇششىمدى جاۋاپ الدى.