Oral qalasynyń ákimshilik quqyq buzýshylyq ister jónindegi mamandandyrylǵan sotynda 10 jastaǵy balany qorqytyp, aqshasyn tartyp alǵan 13 jastaǵy jasóspirimniń anasyna qatysty ákimshilik is qaraldy, dep habarlaidy Dalanews.kz.
Aiyptalǵan balanyń anasy sotta onyń jábirlenýshini uryp-soqqanyn, óz ulymen sóileskenin jáne ol óz áreketin joqqa shyǵarǵanyn rastady.
Jábirlenýshiniń anasynyń aitýynsha, bala ulyn 2 jylǵa jýyq ýaqyt boiy qorqytyp kelgen. Balasy qatty qorqyp qalǵandyqtan, uzaq ýaqyt boiy ózin qorqytqan balanyń atyn aitpaǵan. Ol tatýlasýdan úzildi-kesildi bas tartty.
Sot R.-nyń anasyna ákimshilik jaza taǵaiyndaý kezinde onyń asyraýynda kámeletke tolmaǵan úsh balasy baryn, jumysynyń joqtyǵyn jáne turaqty tabysynyń bolmaýyn, jaýaptylyqty aýyrlatatyn mán-jailardyń anyqtalmaǵanyn eskerdi. Sot ÁQBtK-niń 829-14 jáne 829-16-baptaryn basshylyqqa ala otyryp, R.-nyń anasyn ÁQBtK-niń 127-2-babynyń 1-bóligimen kináli dep tanyp, oǵan ákimshilik jaza – eskertý taǵaiyndady, – delingen Halyk Uni agenttigine joldaǵan habarlamada.
Osyǵan uqsas ákimshilik quqyqbuzýshylyq týraly is Qostanai oblysynyń Beiimbet Mailin atyndaǵy aýdandyq sotynda qaraldy. Onda da mektep oqýshysy sonda oqityn qyzdy júieli túrde qorlap, qorqytyp ári kelemejdegen. Sotta aiyptalýshynyń ákesi kináni tolyq moiyndady.
Sotqa anasy qyzynyń júregi aýyratynyn, al bala qyzyn mazaqtap, qorqytqanyn, sonyń saldarynan qyzy kúizeliske túskenin aitqan. Ata-anasyna balasynyń jónsiz minez-qulqy týraly buǵan deiin de aýyzsha eskertý jasalǵanyn eskerip, sot 25 myń 800 teńge aiyppul saldy.
Qaýly zańdy kúshine engen joq.
