Keıbir qazaqstandyqtar úshin ınternetten bas tartý kútpegen shyǵynǵa aınalyp jatyr. Turǵyndar ondaǵan myń teńge kóleminde qosymsha tólem suralatynyn jáne qyzmetti óshirý prosesi sozylyp ketetinin aıtyp shaǵymdanyp jatyr, dep habarlaıdy Dalanews.kz Finratings basylymyna silteme jasap.

Jelide taraǵan pikirlerge qaraǵanda, jaǵdaı kóbine uqsas senarımen órbıdi. Paıdalanýshylardy ınternet sapasy qanaǵattandyrmaı, kelisimdi buzǵysy keledi. Alaıda qarapaıym rásimniń ornyna túrli kedergilerge tap bolady.

Áleýmettik jelilerde kelisimdi toqtatý kezinde 20 myńnan 40 myń teńgege deıin tólem talap etiletini jıi jazylyp júr. Bul kópshilik úshin kútpegen jaǵdaı bolǵan.

Bir qoldanýshy: «Internetti óshirgim keldi, shamamen 30 myń teńge tóleý kerek dedi», – dep jazǵan.

Keıbir turǵyndardyń sózinshe, másele munymen shektelmeıdi. Operatorǵa habarlasý qıyn, ótinishter uzaq qaralady, al ajyratý merzimi sozylyp ketedi. Biri keńsege birneshe ret barsa, endi biri messendjer arqyly hat jazyp, jaýap kútýge májbúr bolǵan.

Kúrdeli jaǵdaılar da kezdesedi.

Bir qazaqstandyq áıeldiń aıtýynsha, keńsede kelisimshart bóten adamnyń atyna rásimdelgeni aıtylǵan. Al onlaın júıede basqa esim kórsetilgen. Osy aralyqta másele sheshilmeı júrgende ósimpul jınalyp, ınternet tólem ótelgenshe ajyratylmaǵan.

Basqa qoldanýshylar da uqsas jaǵdaılardy bólisken. Olardyń sózinshe, qurylǵyny tapsyrǵannan nemese ótinish bergennen keıin biraz ýaqyttan soń qaıtadan qaryz shyǵyp, eske salatyn qońyraýlar jalǵasqan.

Sonymen birge keı klıentter kerisinshe pikir bildiredi. Olardyń aıtýynsha, ınternetti óshirý esh qıyndyqsyz ótedi – qońyraý shalý nemese onlaın ótinish berý jetkilikti, keıde tek modemdi qaıtarý qajet.

Nelikten qosymsha tólem shyǵady?

«Qazaqtelekomda» munyń sebebi kóbine merzimdi kelisimsharttarmen baılanysty ekenin túsindiredi.

Kompanıa málimetinshe, eger ınternet tómendetilgen baǵamen qosylyp, qyzmetti belgili bir merzim paıdalaný mindettelse, kelisimnen erte bas tartqan jaǵdaıda bazalyq tarıf pen jeńildikpen tólengen baǵanyń aıyrmasy óndirilip alynady.

Iaǵnı bul berilgen jeńildikti qaıtarý retinde qarastyrylady.

Qaı kezde tólem alynbaıdy?

Qosymsha aqy talap etilmeıdi, eger:

• qyzmet sapasy resmı túrde qanaǵattanarlyqsyz dep tanylsa;
• jańa mekenjaıda tehnıkalyq qosylý múmkindigi bolmasa;
• kelisimshart qaıta rásimdelse nemese tarıf sharttary nasharlamaı ózgertilse.

Máseleniń túıini – kópshilik qosylý kezinde kelisimshart talaptaryna mán bere bermeıdi. Internet tez ári tıimdi shartpen qosylady. Biraq odan bas tartý keıde uzaqqa sozylǵan proses pen qosymsha shyǵynǵa ulasýy múmkin.