Ózbekstan prezidenti Shavkat Mirziioev Ortalyq Aziia memleketterine aýanyń lastanýyna qarsy birlesip kúresýdi usyndy. Ol úshin «Ortalyq Aziianyń taza aýasy» atty ortaq konsortsiým qurý bastamasyn kóterdi, dep habarlaidy Dalanews.kz.
Mirziioevtiń aitýynsha, bul qurylym arqyly óńir elderi zaýyttardy jańǵyrtýǵa jáne ziiandy shyǵaryndylardy tazartý júielerin iske qosýǵa birlesip investitsiia sala alady.
"Atmosferalyq aýanyń sapasyn jaqsartý jaǵdaiynda óńir halqynyń densaýlyǵyn qorǵaýdaǵy mańyzdy qadam retinde "Ortalyq Aziianyń taza aýasy" memleketaralyq konsortsiýmyn qurýdy mańyzdy dep sanaimyn", - dedi Ózbekstan basshysy.
Sonymen qatar, ol Ortalyq Aziia elderine ortaq Qyzyl kitap jasaýdy da usyndy. Bul sirek kezdesetin jáne joiylyp bara jatqan janýarlar men ósimdikterdiń biryńǵai tizimi bolmaq.
Eske salaiyq, búgin Astanada Óńirlik ekologiialyq sammit ótip jatyr.
