Qazaqstannyń Aýyl sharýashylyǵy ministrligi Almatydaǵy janarmai quiý beketterine dánnen óndirilgen jańa otyn túse bastaǵanyn habarlady. Vedomstvo málimetinshe, BI-95 avtojanarmaiyn ónerkásiptik kólemde shyǵarýdy KazFoodProducts holdingi bastaǵan, dep habarlaidy Dalanews.kz.
BI-95 ónimi astyqtan alynatyn bioetanoldy paidalaný arqyly óndirilgen. Bioetanol BioOperations kásipornynda daiyndalady. Bul – Soltústik Qazaqstan oblysyndaǵy bidaidy tereń óńdeitin respýblikadaǵy jalǵyz keshen. Qorytyndy ónim qazirdiń ózinde naryqqa túse bastaǵan.
BI-95 – quramyna 5–10 paiyz bioetanol qosylǵan benzin. Ministrlik dereginshe, mundai qospa janarmaidyń úirenshikti sipattaryn, sonyń ishinde oktan sanyn saqtaidy. Sonymen qatar onyń ekologiialyq kórsetkishteri ózgeredi. Bioetanol astyq óńdeý ónimderinen jasalady jáne kómirtegi beitarap komponent sanalady.
Jańa otynǵa kóshý úshin avtokólikterdi qaita jabdyqtaý qajet emes. Aýyl sharýashylyǵy ministrliginiń málimetinshe, BI-95-ti qazirgi benzin qozǵaltqyshtaryna esh ózgerissiz paidalanýǵa bolady.
«Júrgizilgen synaqtar bioetanol qosýdyń negizgi paidalaný sipattaryna áser etpeitinin kórsetti. Qýat pen ainalý momenti dástúrli benzin deńgeiinde saqtalady, al birqatar synaqtarda shyǵaryndylar azaiyp, ónimdilik joǵary bolǵany tirkeldi», – dep málimdedi ministrlik.
Vedomstvo aqparatyna sáikes, bioetanoldy paidalaný usaq dispersti bólshekter shyǵaryndylaryn 70 paiyzdan astamǵa, azot oksidterin AI-92 benzinimen salystyrǵanda 25 paiyzǵa azaitady. Al parniktik gazdar kólemi 60–70 paiyzǵa tómendeidi.
Qazirgi tańda BI-95 bólshek saýdada ázirge tek Ros Petrol janarmai quiý beketteri jelisinde satylyp jatyr.
