Қазақстанның Ауыл шаруашылығы министрлігі Алматыдағы жанармай құю бекеттеріне дәннен өндірілген жаңа отын түсе бастағанын хабарлады. Ведомство мәліметінше, BI-95 автожанармайын өнеркәсіптік көлемде шығаруды KazFoodProducts холдингі бастаған, деп хабарлайды Dalanews.kz.

BI-95 өнімі астықтан алынатын биоэтанолды пайдалану арқылы өндірілген. Биоэтанол BioOperations кәсіпорнында дайындалады. Бұл – Солтүстік Қазақстан облысындағы бидайды терең өңдейтін республикадағы жалғыз кешен. Қорытынды өнім қазірдің өзінде нарыққа түсе бастаған.

BI-95 – құрамына 5–10 пайыз биоэтанол қосылған бензин. Министрлік дерегінше, мұндай қоспа жанармайдың үйреншікті сипаттарын, соның ішінде октан санын сақтайды. Сонымен қатар оның экологиялық көрсеткіштері өзгереді. Биоэтанол астық өңдеу өнімдерінен жасалады және көміртегі бейтарап компонент саналады.

Жаңа отынға көшу үшін автокөліктерді қайта жабдықтау қажет емес. Ауыл шаруашылығы министрлігінің мәліметінше, BI-95-ті қазіргі бензин қозғалтқыштарына еш өзгеріссіз пайдалануға болады.

«Жүргізілген сынақтар биоэтанол қосудың негізгі пайдалану сипаттарына әсер етпейтінін көрсетті. Қуат пен айналу моменті дәстүрлі бензин деңгейінде сақталады, ал бірқатар сынақтарда шығарындылар азайып, өнімділік жоғары болғаны тіркелді», – деп мәлімдеді министрлік.

Ведомство ақпаратына сәйкес, биоэтанолды пайдалану ұсақ дисперсті бөлшектер шығарындыларын 70 пайыздан астамға, азот оксидтерін АИ-92 бензинімен салыстырғанда 25 пайызға азайтады. Ал парниктік газдар көлемі 60–70 пайызға төмендейді.

Қазіргі таңда BI-95 бөлшек саудада әзірге тек Ros Petrol жанармай құю бекеттері желісінде сатылып жатыр.