Memleket basshysy Qasym-Jomart Toqaev Óńirlik ekologiialyq sammittiń plenarlyq otyrysynda sóz sóiledi, dep habarlaidy Dalanews.kz.
Prezident sammit qatysýshylaryna iltipat bildirip, halyqaralyq dialog alańynyń mańyzyna toqtaldy.
"Shyn máninde, búgin – Jer kúni. Osy oraida planetamyzdy qorǵaýǵa jaýapkershilikpen qaraitynymyzdy taǵy da bir málimdeý úshin bas qosyp otyrmyz. Ornyqty damý úshin ortaq kózqaras qalyptastyrý ózekti ári asa mańyzdy. Muny óńir elderi tereń túsinedi. Qazirgi ekologiia tek klimat máselesimen shektelmeidi. Bul – adamzat tirshiliginiń túp negizi. Iaǵni áńgime taza aýa men sapaly sýǵa, búlinbegen topyraq pen senimdi azyq-túlik júiesine, qoǵamnyń turaqtylyǵyna jáne urpaqtyń keleshegine qatysty bolyp otyr. Jalpy aqyl-oidyń tunyqtyǵy, qoǵamdaǵy úilesim men adami baqyt ta osyǵan saiady. Al ekologiia degenimiz - Jer betindegi tirshilikke jaýapkershilikpen qaraityn sanaly ómir salty. Sondyqtan búgingi sammit der kezinde uiymdastyrylyp otyr", – dedi Qasym-Jomart Toqaev.
️"Biz betalysy beimálim aýmaly-tókpeli kezeńde júzdesip otyrmyz. Munyń zardaby óńirlik jáne jahandyq turaqtylyqqa, milliondaǵan adamnyń turmys sapasyna qanshalyq aýyr tiip jatqanyn egjei-tegjeili aitýdyń qajeti joq. Sonyń saldarynan damý jolyndaǵy kúsh-jiger, kúrmeýi qiyn ekologiialyq problemalarǵa jumsalýǵa tiis resýrstar zaia ketip jatyr. Bul rette halyqaralyq qoǵamdastyq erekshe ról atqarady. Seksen jyl buryn qurylǵan Birikken Ulttar Uiymy áli kúnge balamasy joq, ámbebap dialog alańy ekeni sózsiz. Alaida odan beri álem túbegeili ózgeriske ushyrady. Jasandy intellekt búkil adamzat sanasyn jaýlap, kúndelikti ómirge dendep endi. Halyqaralyq quqyqtyń negizi sanalatyn BUU jarǵysynyń buljymas beriktigi týraly jii aitylady. Áitse de ol qalaýyńa qarai tapsyryspen aldyratyn jeńsik as emes. Kerisinshe BUU jarǵysyn birtutas, jan-jaqty qujat retinde qabyldaý kerek. Onyń erejeleri dál sol qalpynda tanylyp, múltiksiz saqtalýǵa tiis. Sol sebepti BUU jáne basqa da iri halyqaralyq uiymdar aýqymy men sipaty jaǵynan buryn-sońdy bolmaǵan ári boljaýy qiyn ózgerister dáýirine qadam basqan qazirgi álemniń aqiqatyn qaperge alǵany jón. Biz BUU jarǵysyndaǵy qaǵidattardy halyqaralyq qarýly qaqtyǵystarǵa qatysty óz yńǵaiymyzǵa qarai qoldanýdan aýlaq bolýymyz qajet. Sonymen qatar, kópjaqty institýttarǵa degen senimge selkeý túspeýi kerek. Degenmen mańyzdy halyqaralyq máselelerdi sheshýge olardyń abyroi-bedeli jetpei jatqany ókinishti", - dedi Toqaev.
