مەملەكەت باسشىسى قاسىم-جومارت توقاەۆ ٶڭٸرلٸك ەكولوگييالىق سامميتتٸڭ پلەنارلىق وتىرىسىندا سٶز سٶيلەدٸ, دەپ حابارلايدى Dalanews.kz.
پرەزيدەنت سامميت قاتىسۋشىلارىنا ٸلتيپات بٸلدٸرٸپ, حالىقارالىق ديالوگ الاڭىنىڭ ماڭىزىنا توقتالدى.
"شىن مەنٸندە, بٷگٸن – جەر كٷنٸ. وسى ورايدا پلانەتامىزدى قورعاۋعا جاۋاپكەرشٸلٸكپەن قارايتىنىمىزدى تاعى دا بٸر مەلٸمدەۋ ٷشٸن باس قوسىپ وتىرمىز. ورنىقتى دامۋ ٷشٸن ورتاق كٶزقاراس قالىپتاستىرۋ ٶزەكتٸ ەرٸ اسا ماڭىزدى. مۇنى ٶڭٸر ەلدەرٸ تەرەڭ تٷسٸنەدٸ. قازٸرگٸ ەكولوگييا تەك كليمات مەسەلەسٸمەن شەكتەلمەيدٸ. بۇل – ادامزات تٸرشٸلٸگٸنٸڭ تٷپ نەگٸزٸ. ياعني ەڭگٸمە تازا اۋا مەن ساپالى سۋعا, بٷلٸنبەگەن توپىراق پەن سەنٸمدٸ ازىق-تٷلٸك جٷيەسٸنە, قوعامنىڭ تۇراقتىلىعىنا جەنە ۇرپاقتىڭ كەلەشەگٸنە قاتىستى بولىپ وتىر. جالپى اقىل-ويدىڭ تۇنىقتىعى, قوعامداعى ٷيلەسٸم مەن ادامي باقىت تا وسىعان سايادى. ال ەكولوگييا دەگەنٸمٸز - جەر بەتٸندەگٸ تٸرشٸلٸككە جاۋاپكەرشٸلٸكپەن قارايتىن سانالى ٶمٸر سالتى. سوندىقتان بٷگٸنگٸ سامميت دەر كەزٸندە ۇيىمداستىرىلىپ وتىر", – دەدٸ قاسىم-جومارت توقاەۆ.
️"بٸز بەتالىسى بەيمەلٸم اۋمالى-تٶكپەلٸ كەزەڭدە جٷزدەسٸپ وتىرمىز. مۇنىڭ زاردابى ٶڭٸرلٸك جەنە جاھاندىق تۇراقتىلىققا, ميلليونداعان ادامنىڭ تۇرمىس ساپاسىنا قانشالىق اۋىر تيٸپ جاتقانىن ەگجەي-تەگجەيلٸ ايتۋدىڭ قاجەتٸ جوق. سونىڭ سالدارىنان دامۋ جولىنداعى كٷش-جٸگەر, كٷرمەۋٸ قيىن ەكولوگييالىق پروبلەمالارعا جۇمسالۋعا تيٸس رەسۋرستار زايا كەتٸپ جاتىر. بۇل رەتتە حالىقارالىق قوعامداستىق ەرەكشە رٶل اتقارادى. سەكسەن جىل بۇرىن قۇرىلعان بٸرٸككەن ۇلتتار ۇيىمى ەلٸ كٷنگە بالاماسى جوق, ەمبەباپ ديالوگ الاڭى ەكەنٸ سٶزسٸز. الايدا ودان بەرٸ ەلەم تٷبەگەيلٸ ٶزگەرٸسكە ۇشىرادى. جاساندى ينتەللەكت بٷكٸل ادامزات ساناسىن جاۋلاپ, كٷندەلٸكتٸ ٶمٸرگە دەندەپ ەندٸ. حالىقارالىق قۇقىقتىڭ نەگٸزٸ سانالاتىن بۇۇ جارعىسىنىڭ بۇلجىماس بەرٸكتٸگٸ تۋرالى جيٸ ايتىلادى. ەيتسە دە ول قالاۋىڭا قاراي تاپسىرىسپەن الدىراتىن جەڭسٸك اس ەمەس. كەرٸسٸنشە بۇۇ جارعىسىن بٸرتۇتاس, جان-جاقتى قۇجات رەتٸندە قابىلداۋ كەرەك. ونىڭ ەرەجەلەرٸ دەل سول قالپىندا تانىلىپ, مٷلتٸكسٸز ساقتالۋعا تيٸس. سول سەبەپتٸ بۇۇ جەنە باسقا دا ٸرٸ حالىقارالىق ۇيىمدار اۋقىمى مەن سيپاتى جاعىنان بۇرىن-سوڭدى بولماعان ەرٸ بولجاۋى قيىن ٶزگەرٸستەر دەۋٸرٸنە قادام باسقان قازٸرگٸ ەلەمنٸڭ اقيقاتىن قاپەرگە العانى جٶن. بٸز بۇۇ جارعىسىنداعى قاعيداتتاردى حالىقارالىق قارۋلى قاقتىعىستارعا قاتىستى ٶز ىڭعايىمىزعا قاراي قولدانۋدان اۋلاق بولۋىمىز قاجەت. سونىمەن قاتار, كٶپجاقتى ينستيتۋتتارعا دەگەن سەنٸمگە سەلكەۋ تٷسپەۋٸ كەرەك. دەگەنمەن ماڭىزدى حالىقارالىق مەسەلەلەردٸ شەشۋگە ولاردىڭ ابىروي-بەدەلٸ جەتپەي جاتقانى ٶكٸنٸشتٸ", - دەدٸ توقاەۆ.
