Astanada meditsina qyzmetkerine kúsh qoldanǵan er adamǵa qatysty úkim shyqty, dep habarlaidy Dala News.
Qalanyń aýdanaralyq qylmystyq ister jónindegi sotynyń málimetinshe, aiyptalýshy 1 jyl 6 aiǵa bas bostandyǵynan aiyryldy. Jazasyn qylmystyq atqarý júiesiniń eń tómengi qaýipsizdik mekemesinde óteidi.
Sotta anyqtalǵandai, oqiǵa 2026 jylǵy 13 naýryzda bolǵan. Aiyptalýshy mas kúiinde saýda úiiniń avtoturaǵynda meditsinalyq kómektiń kórsetilýine narazylyq bildirip, feldsherge kúsh qoldanǵan.
Onyń áreketi saldarynan meditsina qyzmetkerine dene jaraqaty keltirilmegenimen, fizikalyq aýyrsyný bolǵan jáne meditsinalyq qyzmettiń qaýipsizdigine nuqsan kelgen.
Sot barysynda prokýror aiyptalýshyǵa 1 jyl 6 ai bas bostandyǵynan aiyrý jazasyn suraǵan. Aiyptalýshy kinásin moiyndap, bas bostandyǵynan aiyrmaýdy ótingen, al jábirlenýshi qatań jaza taǵaiyndaýdy talap etken.
Sot aiyptalýshynyń buryn sottalmaǵanyn eskergen. Alaida onyń qoǵamdyq orynda ishimdik ishkeni jáne tynyshtyqty buzǵany úshin ákimshilik jaýapkershilikke tartylǵany belgili bolǵan.
Jeńildetetin mán-jai retinde onyń ókinishi, al aýyrlatatyn mán-jai retinde qylmystyń mas kúiinde jasalǵany tanyldy.
Is jedel tártipte qaralǵandyqtan, jaza eń joǵarǵy merzimniń jartysynan aspaǵan.
Úkim zańdy kúshine engen joq.
