Áleýmettik jeliden Ádemini alǵash kórgende qatty tań qaldym. Kishkentai ǵana búldirshinniń patriottyǵy súisintpei qoimady. Tý kórse kez kelgen jerden qiyp alyp, odan qaldy kiimine japsyryp, tipti bireýdiń kóliginen kórse de jabysyp airylmai qalýy onyń erekshe patriottyǵynan habar berse kerek. Al júrgizýshi kýáliginen nemese jeke kýálik sekildi qujattardan, odan qaldy kez kelgen jerden qiyp alǵan tý úshin ata-anasynyń qabyq shytpaýy tipti qýantty. Kishkentai patriottyń anasymen tildesýge asyqtym.
Qujattaǵy týdy qiyp alǵan
«Patriot keiipker izdegende bizdi Ádeminiń áreketi qatty súisindirdi. Ózińizdiń reaktsiiańyz qalai boldy alǵashynda?» degen saýaldan bastadyq Ádeminiń anasymen suhbatymyzdy. Basqa basqa qujattaǵy týdy qiyp alýdyń mashaqaty kóp ekeni ras. Óitkeni ol qujatty qalypqa keltirýdiń ózi ońai emes.
Bul týraly shydamdy ana «Ádemi kishkentai kezinen elimizdiń ánurany men týdy jaqsy kóredi. Qolyna elimizdiń kók týy tússe tastamai ustap júretin edi. Ózimizdiń otbasymyzda, týǵan týystyń ortasynda onyń ánuran men týymyzǵa degen qurmeti men yqylasyn súisinip aityp otyratynbyz ózara.
Bir kúni sińilim onyń sol áreketterin «áleýmettik jelige salaiyqshy» dep ótinip qoimaǵan soń sala salǵan bolatynmyn. Bir kúnniń ishinde birneshe million jinap sol video kópshiliktiń nazaryn aýdardy.
Halyqtyń yqylasyn kórip keiin onyń sol áreketterin udaiy salyp otyratyn boldym. Basynan-aq onyń áreketin quptaýshylar kóp boldy. Videony kórgenderdiń barlyǵy ony qoldap, nazaryn aýdaratyn» deidi.
Bizdi ǵana emes halyqtyń da erekshe nazaryn aýdartqan Ádeminiń qylyǵy keiin turaqty túrde anasynyń paraqshasynan kórinis tabatyn bolǵan.
Týdyń sýretin úidiń ár buryshyna ilip qoiǵandy jaqsy kóredi...
«Paraqshańyzdan baiqaǵanymdai týdy, bairaǵymyzdy aqshadan,
júrgizýshi kýáliginen qiyp alypty. Basqa taǵy qandai oqiǵalar oryn aldy?» dep suradyq anasynan.
«Balabaqshadan kele salyp, kók jáne sary tústi qaryndashpen týdyń sýretin salyp, úidiń ár buryshyna ilip qoiǵandy jaqsy kóredi. Qolyna tý ustap júrgendi jaqsy kóredi.
Ózderińiz baiqaǵandaryńyzdai aqshadan nemese kiimde bolsa kez kelgen jerden qiyp alady da óz kiimine jabystyryp alǵandy jaqsy kóredi. Elimizdiń rámizderine degen sondai bir erekshe mahabbaty bar.
Odan bólek álemdi tanytqan ánshi Dimash Qudaibergenniń oryndaýyndaǵy ánuranymyzdy, Eskendir Hasanǵaliev atamyzdyń oryndaýyndaǵy «Atameken» sekildi pariottyq ánderdi qosyp alyp únemi tyńdap júredi.
Patriottyq ánderdi bar daýysyna shyǵaryp qoiyp tyńdaǵandy jaqsy kóredi. Ádeminiń boiyndaǵy talantty biz eki jasynan bastap baiqadyq. Óte zerek boldy. Birneshe eldiń alfavitin qatesiz jazyp bere alady. Sandardy sanǵa qosyp jaza alatyn sol eki jasynda aq. Sýret salatynyn da erte baiqadyq.
Úide oǵan tolyqtai shyǵarmashylyq erkindik berýge tyrysamyz. A4 qaǵazdy ailyǵymyz túse sala ártúrli boiaýlarymen, úige ákelip qoiatynbyz. Daiyndyq kýrsynan kele salyp, qaǵazdaryn alyp otyra qalatyn. Áli sol. Súiikti isi án tyńdaý, ásirese klassikalyq ánderdi tyńdaýdy jaqsy kóredi. Dimashtyń ánderin kúnine birneshe márte tyńdap júredi. Onyń daýysyn jaqsy kóredi.
Ádemige aiaǵym aýyr ekenin 17 aptasynda biraq bilgen edim. Endokrinologtan em qabyldap júrgendikten jáne garmondyq dárilerdi kóp iship qoiǵandyqtan dárigerler maǵan birden jasandy túsik jasaýdy usyndy.
Biraq ÝZI-de qol-aiaǵy sap-saý jatqan balany aldyrýǵa júregimniń dáti barmady. Ol kezde «aýtizm» degen sózdi atymen estip kórmegem. Sábi aman-saý dúniege keldi. 1 jasyna deiin ýildep, gýildep saý baladai damyp kele jatty.
1 jasyndaǵy ekpeden soń 1 apta qyzýy kóterildi de, múlde men tanymaityn Ádemige ainaldy. Eskerte keteiin ekpe jái ǵana aýrýdy qozdyrýshy kúsh boldy dep esepteimin. Atyn atasa qaramaidy, ainalamen sharýasy joq, bir orynda ainalyp júre beredi, «keldiń be», «kettiń be» nazar aýdarmaidy, basyna aýyr jastyqty basyp alyp jatqandy jaqsy kóredi. Ózine ǵana belgili álemi bar. Sol kúnnen bastap biz kúresti bastadyq.
Balany emge aparmaǵan jerimiz, ishpegen dárimiz joq. Aýtizm – mi qurylymy damýynyń buzylýy, áleýmettik ózara árekettesýdiń buzylýy ǵoi endi. Biraq aýtizmniń de ORVI sekildi neshe túri bar. Qyzym sóilemese de sondai daryndy, ushqyr oily, sondai zerek bolyp ósip keledi.
2 jasynan kúlli áripter men sandardy, tústerdi jatqa biledi. Sýret salǵandy óte jaqsy kóredi. Sýretti jáne úlken adamnan artyq salady. Ánuranmen oianyp, ánuranmen uiyqtaidy, qolynan kók týyn tastamaidy» deidi erekshe búldirshinniń anasy.
Sondai-aq «árine, adamǵa jaǵymsyz is-áreketteri de joq emes. Qalyptasyp qalǵan stimder men is-qimyldar. Kóp sózdi áli túsinbeidi, giperbelsendi. Ózimen ózi kúlýi múmkin. Eshkimge baǵynbai jylaýy múmkin. Biraq ol, kóp adam oilaityndai onyń tárbiesizdiginen emes, ereksheliginen» deidi anasy.
Ádemi álemdegi birneshe eldiń týyn jatqa biledi
Elin janyndai jaqsy kóretin búldirshinniń jalpy qandai bala ekeni de bizdi qyzyqtyrdy.
Bul týraly anasy «Ádemi bizdiń erekshe balaqai. Oǵan aýtizm degen diagnoz qoiylǵan. Jaqynda jeti jasqa toldy. Biraq áli sóilemeidi. Aýtizm degen aýrýdy bilesiz ǵoi iá, balanyń qoǵammen árekettesýiniń buzylýy, mi qurylymy damýýynyń buzylýy sekildi ózgeristeri bar.
Biraq soǵan qaramastan óte zerek, alǵyr. Este saqtaý qabileti kúshti. Tipti kózbe kóz jattap alady kez kelgen nárseni.
Bizdiń elimizdiń ǵana emes álemdegi birneshe eldiń týlaryn jatqa biledi. Olardyń árqaisysynyń astyna sol eldiń attaryn jazyp qoiady.
Sóilemese de qylyqty, tentek bala. Fantaziiasy myqty. Neshe túrli nárse oilap taýyp júredi. Mýltfilmniń keiipkerleriniń sýretin jaqsy salady. Árbir qimyl qozǵalysyn este saqtap, qaǵazǵa ainytpai túsiredi. Sýretti jalpy úlken adamdar sekildi jaqsy salady.
Ermeksazben mýltfilmniń keiipkerlerin jaqsy jasaidy. Óte tez, jyldam, súikimdi etip jasai qoiady. Jalpy klei, qaishy, ermeksazben jaqsy jumys jasai alady. Tipti keide qaǵazdan ústine kiim jasap alady. Óte bir sondai pysyq qyz dep aita alamyn» deidi.
Ministrlik syi jasaǵan
Áleýmettik jelide Ádemige ministrlik tarapynan syi jasalǵanyn baiqap qalǵan edik. Kelesi suraǵymyz osy turǵyda órbidi. «Ádeminiń patriottyǵyna tań qalǵan Qalqaman Sarin aǵasy men ministrlik tarapynan syi jasalypty.
Taǵy patriot qyzdyń áreketi kimderdiń nazaryn aýdardy?» degen suraǵymyzǵa orai, «Aqyn aǵamyz Qalqaman Sarin meniń paraqshama burynnan jazylǵan bolatyn. Sol meniń paraqshamnan baiqap Ádemige týdyń sýreti bar estelikter syilady. Men de óleń jazamyn, aqynmyn. Sondyqtan Qalqaman aǵamen tyǵyz qarym-qatynasta aralasatynmyn.
Sodan meniń paraqshamnan Ádeminiń qylyqtaryn, ónerin kórip súisinip júretin. Bir kúni eki myń teńgelik aqshadaǵy týdyń sýretin qiyp alyp, fýtbolkasyna japsyryp alǵanyn kórip, «men ózim Ádemige syi jasaǵym keledi» dedi.
Sol áńgimeden soń tý men eltańbanyń tósbelgisin syiǵa tartty. Sondai-aq, videony jelidegi paraqshama salǵan kúni ministrlikten habarlasty. QR Mádeniet jáne aqparat ministrliginiń Geraldikalyq jumys basqarmasynan habarlasyp, Ádemige syi siiapatymyzdy jasap barsaq bola ma dep surady.
Qýana qabyl aldym. Úige kelip, kóptegen syi jasady. Onyń ishinde týymyz, kiiz úi beinesindegi radio syilady. Odan halyqymyzdyń kóptegen maqal mátelderi, jyr termelerin, dástúrli ánderi, halyq ertegileri men aitystaryn da tyńdaýǵa bolady eken. Ádemige kúshti ermek boldy. Qolynan tastamai tyńdap júredi» deidi.
Týdyń sýreti bar kiimderi de kóp
Alaida týǵa degen sonshalyqty qushtarlyǵyna qaramastan Ádeminiń anasy oǵan týdyń sýreti bar syi jasaýǵa talpynbapty. «Alaida elimizdiń túkpir túkpirinen print ortalyqtar men dúkenderdiń ieleri habarlasyp Ádemige syi jasaǵymyz keledi» dep kóp týdyń, bairaqtyń sýreti bar kiimder jibere bastady.
Shymkent, Almaty, Semei, Astananyń ózinen de, Qaraǵandydan Ádeminiń aty jazylǵan, tý beinelengen kóp syilar, fýtbolkalar, jeideler jibere bastady. Odan bólek «Kórkem brend» degen qazaqsha ulttyq naǵyshtaǵy shapan tigetin tseh ádemi shapan tigip berdi.
Qazir ol Ádeminiń eń súiikti kiimine ainaldy. Kúndiz túni tastamai kiip júredi. Balabaqshaǵa ol kiimsiz barmaidy. Sondai kúige jetti. Sondai-aq kóshede tý ilinip tursa, kólikterdiń aldynda tý ilinip tursa shattanyp, máz meiram bolady. Toqtap turǵan kólik bolsa ishine kirip týdy alýǵa áreket jasaǵan kúnderi de boldy» deidi.
Ádeminiń ata-anasymen de tanysqymyz keldi. «Biz joldasym ekeýimiz de shyǵarmashylyqtyń adamdarymyz. Óleń jazamyz, Qazaqstan Jazýshylar Odaǵynyń múshesimiz. Biz úsh balanyń ata-anasymyz. Úlkenimiz - Diliara, 10 jasta. Biyl 4 synypty aiaqtaidy. Ádemi – úidiń ekinshisi, 7 jasta. Ulymyz Álihan – 5 jasta» deidi Ádeminiń anasy Aizada Rahymjanova. Kishkentai ǵana júregine elin, jerin súietin, qurmetteitin sezim bergen Ádeminiń áreketi basqa da qazaqstandyqtarǵa úlgi bolǵai!
