Búgin, 2024 jylǵy 5 shildede, Arys qalasyndaǵy áskeri bólim aýmaǵynda káriz júiesine qyzmet kórsetý men tazalaý jumystaryn júrgizý kezinde káriz gazymen ýlaný saldarynan úsh adam qaza tapty, - dep habarlaidy Dalanews.kz Qorǵanys ministrligine siltep.
Qaza tapqandardyń arasynda eki azamattyq tulǵa jáne bir kelisimshart boiynsha áskeri qyzmetshi bar.
Oqiǵa jumys barysynda abaisyzda qudyqqa qulap ketken Shymkent aýdandyq paidalaný bóliminiń jumysshysyn qutqarý kezinde bolǵan. Oǵan kómekke kelgen taǵy eki jumysshy men kelisimshart boiynsha eki áskeri qyzmetshi de jaǵdaidyń nasharlaýyna bailanysty joǵary jaqqa kóterilip shyǵa almaǵan.
Saldarynan úsh adam sol jerde qaza tapty. Taǵy bir jumysshy men áskeri qyzmetshi Arys qalasynyń aýrýhanasyna jetkizildi. Qazirgi tańda olardyń jaǵdaiy turaqty-aýyr dep baǵalanyp otyr.
Qorǵanys ministrliginiń basshylyǵy men Qarýly kúshterdiń jeke quramy qaza tapqandardyń týystary men jaqyndaryna qaiǵylaryna ortaqtasyp kóńil aitady.
Olardyń otbasylaryna barlyq qajetti kómek kórsetiletin bolady.
Atalǵan fakti boiynsha QR IIM ÁTB Shymkent bólimimen QR QK 156-baby 4-bóligi boiynsha sotqa deiingi tergep-tekserý bastaldy (eńbekti qorǵaý erejelerin buzý).
