Áleýmettik jelide Qytaıdyń Changan kólikterine qatysty syn kóbeıdi, dep habarlaıdy Dalanews.kz.
Jeli qoldanýshylarynyń biri TikTok-ta osyndaı vıdeo jarıalady. Vıdeo avtorynyń aıtýynsha, Changan CS55 kóliginiń qozǵaltqyshy otalmaı qalǵan.
"Birinshi, ekinshi sılındrde kompresıa bar, tórtinishsinde kompresıa joq", - deıdi vıdeodaǵy er adam.
"Názik kólikter eken ózderi", "Taǵy biraz shydańdar, talaı konsert kóremiz", "Ol benzınnen emes, kóliktiń ózi arzan, zaýyt oǵan arzan "svecha" salyp tur", "Bes jylda qoqysqa aınalady", - degen jeli qoldanýshylary vıdeoǵa.
Osylaısha Qytaı kólikteriniń Qazaqstandaǵy daýy endi órshı bastaǵandaı. Tutynýshylar quqyǵyn qorǵaý komıtetiniń dereginshe, 2024 jyly elimizde kólikke qatysty tirkelgen 144 shaǵymnyń 57-si, ıaǵnı árbir onynshysy dál osy Qytaı kólikterine baılanysty bolǵan.
Bul - naryqqa jańa serpinmen kirip, qoljetimdi baǵasymen tutynýshyny ózine tartyp júrgen Qytaı kólikteriniń "ımıjine" aıtarlyqtaı syzat túskeniniń belgisi.
Tutynýshylar negizinen qozǵaltqyshtyń aqaýy men berilis qorabynyń (korobkiniń) jıi isten shyǵatynyn aıtyp, shaǵymdanǵan.
Buǵan qosa, elektronıka, salqyndatý júıesiniń olqylyqtary, tipti óndirýshiler málimdegen sıpattamalardyń shynaıy kórsetkishterge saı bolmaýy da satyp alýshylardyń kóńilin sýytqan. Keıbir klıentter kólikti satýshyǵa qaıtaryp berýge deıin barǵan.
Memlekettik organdar aralasqannan keıin ǵana avtosalondar kólikti jóndep berýge nemese aqaýly bólshekterdi tegin aýystyrýǵa kelisipti.
Máselen, Aqmola oblysynda tutynýshylar kóliktiń qozǵaltqyshyn aýystyrýdy talap etip, shaǵym kólemi 10 mıllıon teńgege jýyqtaǵan. Al Aqtóbe oblysynda sot sheshimimen avtosalondar tutynýshylarǵa moraldyq shyǵyndy qosa alǵanda, 16 mıllıon teńgeden astam qarjy tólegen. Atyraý oblysynda tutynýshyǵa 7 mıllıon teńgeden astam qarajat qaıtarylǵan.
"Qozǵaltqysh pen berilis qoraby sekildi eń mańyzdy bólshekterde jıi kezdesetin aqaý qytaıdyń arzan kóligin qymbat "bas aýrýǵa" aınaldyrýy ábden múmkin. Eger táýekelge bel býsańyz, aldyn ala kepildiktiń sharttaryn, dılerlerdiń qyzmet sapasyn muqıat tekserip alǵan jón. Al senimdilik pen qaýipsizdikti birinshi orynǵa qoıatyn adamǵa ázirshe basqa brendterge nazar aýdarý durysyraq bolatyn sıaqty", - deıdi sarapshylar bul týrasynda.
Aıta keteıik, Changan Automobile Group - kólik shyǵaratyn Qytaı kompanıasy. Ol eldegi eń iri 20 óndirýshiniń qataryna kiredi. Onyń shtab-páteri Chýnsın qalasynda ornalasqan. 2021 jyly satylǵan kólik sany boıynsha (2,301 mln.) kompanıa Qytaıda 4-shi orynǵa ıe boldy.
