Qazaqstanda merzimdi qyzmettiń jańa formattaǵy SARBAZ+ pılottyq jobasyn iske qosý josparlanyp otyr,- dep habarlaıdy Dalanews.kz.
Osy kúzde Almaty oblysynda ornalasqan Áýe qorǵanysy kúshteriniń 78460 áskerı bóliminde 150 áskerge shaqyrylýshy jańa úlgi boıynsha qyzmet atqara bastaıdy. SARBAZ+ sarbazdardyń jeke jáne kásibı áleýetin damytýǵa, qyzmet kórsetý jaǵdaılaryn jaqsartýǵa jáne kúndelikti qyzmetti basqarýǵa sıfrlyq quraldardy engizýge baǵyttalǵan sheshimderdi synaqtan ótkizýge arnalǵan alańǵa aınalady.
"SARBAZ+ jobasy áskerı qyzmetti kásiptik oqytý elementterin, sıfrlyq sheshimderin, medısınalyq monıtorıń júıesin jáne bos ýaqytty uıymdastyrýdy kiriktirýdi kózdeıdi. Árbir áskerı qyzmetshige naqty ýaqyttaǵy bıometrıalyq kórsetkishterdi baqylaý úshin fıtnes-bilezik beriledi dep josparlanyp otyr. Derekter medısınalyq personal men komandırlerge qoljetimdi ortalyqtandyrylǵan monıtorıń júıesine kelip túsedi, bul jeke quramnyń densaýlyq jaǵdaıyn turaqty baqylaýdy qamtamasyz etedi. Beıne taldaý júıesi de engizilip jatyr", - dep jazylǵan habarlamada.
Joba aıasynda telekomýnıkasıa jáne IT salasynda - "Qazaqtelekom" jáne "Transtelekom" kompanıalarymen birlesip, bazalyq oqytý baǵdarlamalary kózdelgen. Áskerdegi qyzmet aıaqtalǵannan keıin qatysýshylar atestattaýdan ótip, jumysqa ornalasý kezinde paıdaly sertıfıkattar ala alady. Oǵan qosa ushqyshsyz ushatyn qurylǵylar men radıobaılanysty paıdalaný negizderine oqytý josparlanǵan. Qosymsha qazaq jáne aǵylshyn tilderinde sabaqtar uıymdastyrylady.
Áskerı qyzmetshilerdiń psıhologıalyq kúıin qoldaý úshin emosıany shyǵarý bólmesi ashylady. Ofıserler men serjanttar úshin zamanaýı, quzyretti jáne stresske tózimdi áskerı maman qalyptastyrýǵa baǵyttalǵan jeke tulǵany damytý boıynsha trenıńter qarastyrylǵan.
SARBAZ + baǵdarlamasy merzimdi qyzmet sarbazdaryna ǵana áser etpeıdi. Bólimniń ofıserlik jáne serjanttyq quramy da, onyń ishinde CCNA Cisco jelilik tehnologıalar salasyndaǵy halyqaralyq baǵdarlamasy boıynsha biliktiligin arttyrýdan ótedi.
Áskerge shaqyrylýshylardy irikteýdiń yńǵaılylyǵy úshin jobanyń resmı saıty ázirlendi. Platformada qyzmetke kirý tártibi, ótý sharttary jáne irikteý kezeńderi týraly aqparat ornalastyrylǵan. Áskerge shaqyrylýshylar onlaın-tirkeýden óte alady, sodan keıin olardyń saýalnamalaryn bólim ókilderi men jergilikti áskerı basqarý organdarynyń qatysýymen komısıa qaraıdy. İrikteýden ótken úmitkerler qabyldanǵany jaıly habarlama alady.
"SARBAZ+ — áskerı qyzmettiń úlgisi ǵana emes, sonymen qatar jeke jáne kásibı ósý múmkindigi. Biz árbir áskerge shaqyrylýshynyń azamattyq ómirde paıdaly bolatyn naqty bilim men daǵdy alyp, áskerden zapasqa shyǵýyna jumys isteımiz", — dep atap ótti Qorǵanys mınıstriniń orynbasary Darhan Ahmedıev.
Joba sátti iske asyrylǵan jaǵdaıda ony Qazaqstan Respýblıkasy Qarýly Kúshteriniń basqa da bólimshelerine kezeń-kezeńimen engizý josparlanyp otyr.
