Qazaqstan álemde jan basyna shaqqandaǵy ajyrasý sany boiynsha aldyńǵy oryndardyń birinde tur, dep habarlaidy Dalanews.kz.
Internet-marketolog Erlan Muqashev buǵan basty sebep – áleýmettik jeliler ekenin aitady. Onyń pikirinshe, Instagram-daǵy jyltyraq ómirge qarap, adamdar óz tirshiligin tómen baǵalap, kóńili qalýda.
– Qazaqstan nege álemde ajyrasý boiynsha ekinshi orynda tur? Qarjy qiynshylyǵy ma, álde opasyzdyq pa dep oilaisyń ba? Joq, basty sebep – áleýmettik jeliler. Rilstardan bireýdiń kólik syilap jatqanyn, Parijde tańǵy as iship otyrǵanyn, gúl japyraqtarynda shomylyp júrgenin kóresiń. Al óz ómiriń – kúndelikti kúibeń tirshilik: balanyń mazasyzdyǵy, kúiip ketken keshki as. Salystyrasyń. Salystyrǵan saiyn, óz ómirińniń qadirin túsire bastaisyń.
Sol kezde renish, ókpe, kóńil tolmaýshylyq paida bolady. Biraq janynda júrgen adam – bloger emes, ol shyn máninde seni úshin tyrysyp júrgen jan. Ol laik úshin emes, sen úshin ómir súrip júr. Al áleýmettik jeli – ol shyndyq emes, jai ǵana ádemi kadrlar. Bul – shoý. Sondyqtan otbasyńdy bireýdiń storisimen ólsheme. Lentany jaýyp, qasyńda júrgen adamǵa nazar aýdar, – dep keńes beredi sarapshy.
Eske salaiyq, buǵan deiin Májilis depýtaty Ardaq Nazarovtyń ajyrasý kórsetkishterine qatty alańdaitynyn aityp, ajyrasqan azamattarǵa tabys salyǵyn kóterý usynysyn aitýy qoǵamda úlken rezonans týdyrǵan edi. Bul usynysty saiasattanýshy Ǵaziz Ábishev óziniń saraptamalyq jazbasynda synǵa alyp, ony bizdiń qoǵamdaǵy «mahabbatqa májbúrleý mádenietiniń» taǵy bir kórinisi retinde sipattaǵan bolatyn.
Sarapshy mundai tásildiń tek salyq saiasaty arqyly emes, qalyńdyq urlaý, burynǵy áieldi ańdý, tilge qysym jasaý, radikaldy dini úgit, tipti ýltraliberaldyq ideologiiadaǵy shekten shyǵý formasynda da kórinis tabatynyn atap ótti. Onyń aitýynsha, bul qubylystardyń barlyǵynda da adamdardan óz erkimen jaqsy kórýi talap etiledi. Nátijesinde mahabbatty kúshtep nyǵaitamyz-mys. “Unasa da, unamasa da, tóze ber, sulýym” degen ustanym sol ǵasyrlar qoinaýynan jetken mádeni shtamp.
Sonymen qatar,Ábishev Ardaq Nazarov ajyrasqan adamdardy jazalaý arqyly otbasyn saqtap qalýdy emes, qazaq qoǵamyndaǵy otbasy institýtynyń damýyn tejeitin qadam usynyp otyr dep esepteidi. Mundai májbúrleý – otbasyny saqtaý emes, kerisinshe, onyń tabiǵi damýyn tejeý.
