Soltústik Qazaqstan oblysynda úsh aýdan ákimine qatysty tártiptik jaza qoldanyldy. Bul týraly óńirlik mamandandyrylǵan aýdanaralyq ákimshilik sot habarlady, dep habarlaidy Dalanews.kz.
Sot jer daýlary men memlekettik satyp alý nátijelerin daýlaýǵa qatysty ákimshilik isterdi qaraý barysynda Ákimshilik rásimdik-protsestik kodeks normalarynyń buzylǵanyn anyqtaǵan. Oblys ákimine úsh jeke qaýly joldanyp, olardyń barlyǵy zańdy kúshine engen.
Birinshi jaǵdai:
Sot aýdan ákiminiń jol boiyndaǵy dámhana qurylysyna eskizdik jobany kelisýden bas tartýǵa bailanysty jazbasha shaǵymdy qaramaǵany úshin jeke qaýly shyǵarǵan.
"Qurylys bóliminiń áreketine túsken shaǵymdy aýdan ákimi ózi qarap sheshýi tiis bolatyn. Alaida ol kerisinshe, bul shaǵymdy dál sol shaǵymdanyp otyrǵan organǵa qaita joldaǵan. Bul – tómen turǵan memlekettik organ sheshimine túsken shaǵymdy joǵary turǵan organ qaraýy tiis degen ÁRPK talabynyń buzylýy", – delingen sot habarlamasynda.
Ekinshi jaǵdai:
Sot aýdandyq turǵyn úi-kommýnaldyq sharýashylyq bóliminiń joldardy paidalaný boiynsha memlekettik satyp alý nátijelerin zańsyz joiǵanyn anyqtady. Bólim bul áreketin aýdittiń bolmaǵan sheshimine silteme jasap túsindirgen.
Memlekettik satyp alý konkýrsynda jeńimpaz atanǵan tarap – talapker. JKH bólimi óz qateligin moiyndaǵan jáne aýdit departamentinen onyń áreketteriniń zańsyzdyǵy týraly resmi hattar túskenine qaramastan, aýdan ákimi sotta talapkerdiń talabyn qanaǵattandyrmaýdy suraǵan.
Sot ákimniń bul áreketin óziniń qurylymdyq bólimshesin qorǵaý dep baǵalady.
Úshinshi jaǵdai:
Sot aýdan ákimdiginiń fermerlik sharýashylyqqa aýyl sharýashylyǵy jerin uzaq merzimdi jalǵa berý týraly qaýlysyn zańsyz dep tanydy.
