Astana qalasy jáne Soltústik Qazaqstan oblysynyń uiymdasqan qylmysqa qarsy kúres bólinisteri men prokýratýra organdarynyń birlesken jedel is-sharalarynyń nátijesinde el aýmaǵynda adam saýdasyna bailanysty qylmystarǵa qatysy bar eki qylmystyq toptyń áreketi toqtatyldy, - dep habarlaidy Dalanews.kz.
Qylmyskerler internet-resýrstardy júieli túrde paidalana otyryp, jynystyq qanaýǵa qatysty zańsyz qyzmet túrlerin jarnamalap, júrgizip otyrǵan. Olardyń áreketi uiymdasqan sipatqa ie bolyp, milliardtaǵan paida tabýǵa ákelgen. Aldyn ala derekter boiynsha qylmystyq toptyń kúndelikti tabysy 1,5 mln teńgege deiin jetken, al 2024 jyldyń basynan beri qarjy ainalymy 1,7 mlrd teńgeden asady.
Bul qylmystyq jeliniń aýqymyn jáne uiymdasqan deńgeiin kórsetedi. Júrgizilgen tintý barysynda aqsha, bank kartalary, avtokólikter, kompiýterler, uialy telefondar jáne basqa da tsifrlyq aqparat tasymaldaǵyshtar tárkilendi.
Negizgi figýranttar men olardyń sybailastaryna qatysty qamaýǵa alý túrindegi bultartpaý sharasy qoldanyldy.
Atalǵan faktiler boiynsha Qylmystyq kodekstiń adam saýdasy men uiymdasqan qylmystyq topty qurý jáne oǵan qatysý baptary boiynsha sotqa deiingi tergeý amaldary júrgizilýde. 12 jylǵa deiin bas bostandyǵynan aiyrý jáne múlkin tárkileý túrindegi jaza qarastyrylǵan. Ishki ister ministrligi basqa da múddeli memlekettik organdarmen birlese otyryp, zańsyz qyzmetti júzege asyrý úshin paidalanylatyn internet-resýrstardy anyqtaý jáne buǵattaý jumystaryn belsendi túrde jalǵastyrýda.
