Italiianyń Portofino qalasynda ótken XI Halyqaralyq opera baiqaýynda (CLIP 2025) qazaqstandyq opera ánshisi Aigerim Altynbek tarihi jeńiske jetip, birden tórt bedeldi marapatty ielendi,- dep habarlaidy Dalanews.kz
Concorso Lirico Internazionale di Portofino baiqaýyna qatysqan Aigerimniń jetistigi baiqaý tarihynda buryn-sońdy bolmaǵan oqiǵa boldy: ol bir ýaqytta Birinshi oryndy, Kórermender kózaiymy júldesin (Emotion Prize), "Úzdik áiel daýysy" júldesin jáne Mýzykalyq synshy, professor ári art-direktor Karlo Maierdiń arnaiy syilyǵyn jeńip aldy.
Qazylar alqasynyń tóraǵasy, tanymal opera menedjeri Domeniko Meierdiń aitýynsha, Aigerim Altynbek baiqaýdyń barlyq kezeńinde qazylar alqasynyń biraýyzdan birinshi ornyna ie bolǵan. Mundai jaǵdai óte sirek kezdesedi jáne kásibi qaýymdastyq pen kórermenderdiń tolyq qoldaýyn kórsetedi.
Baiqaýǵa álemniń túkpir-túkpirinen 200-ge jýyq ótinim túsip, onyń ishinde 92 oryndaýshy jartylai finalǵa ótti. Al finalǵa shyqqan 10 úzdik vokalisttiń óneri Teatro Carlo Felice orkestriniń súiemeldeýimen Portofino ortalyǵyndaǵy ashyq sahnada oryndaldy. Finaldyq gala-kontsert Italiia ulttyq telearnasynda tikelei efirde kórsetildi.
Aigerimge erekshe marapattardyń biri – Chilidegi Ibáñez-Atkinson qory taǵaiyndaǵan "Úzdik áiel daýysy" júldesi boldy. Bul qor alǵash ret Eýropadan tys oryndaýshyǵa qoldaý bildirip, Aigerimge kásibi usynym hat pen Latyn Amerikasynda shyǵarmashylyqty jalǵastyrýǵa shaqyrý usyndy. Bul qazaqstandyq ánshiniń halyqaralyq sahnada jańa múmkindikterge jol ashty.
Aigerim Altynbektiń jeńisi – tek jeke tabys emes, sonymen qatar qazaqstandyq mádeniet úshin aitýly oqiǵa. Qatty báseke jaǵdaiynda ol vokaldyq sheberliktiń, sahnalyq daiyndyq pen kórkemdik mánerdiń joǵary deńgeiin kórsete otyryp, qazaqstandyq vokal mektebiniń álemdik deńgeide ekenin dáleldedi.
Esterińizge sala keteiik, buǵan deiin Aigerim Altynbektiń 2025 jylǵy 22–27 shilde aralyǵynda ótken baiqaýdyń finalyna shyqqany habarlanǵan edi.
