Tutas Almaty oblysynda 8 aı ishinde ınvestısıa aǵyny 19%-ǵa ulǵaıdy, onyń jalpy quny 320 mlrd teńgeden asyp túsedi. Oblys ákiminiń sózine sensek, jyl basynan beri oblysta 54,2 mlrd. teńgeniń 10 iri ınvestısıalyq jobasy júzege asyrylyp, 700-ge jýyq jumys orny ashyldy.
Eń iri jobalar – «Naýryz Agro» asyl tuqymdy qus reprodýktory, «Alúgal» qorytpalarynan qurylys materıaldaryn shyǵaratyn zaýyt, «Medıkal Holdıń Sintez-KZ» medısınalyq tıtan ımplantattary men trenajerlar óndirisi jáne «Qarasaz Agro» balyq sharýashylyǵy jáne t.b.
Sonyń ishinde Eńbekshiqazaq aýdanynyń ekonomıkasyn damytýǵa 26 mlrd teńgege jýyq ınvestısıa tartylǵan, bul ótken jylmen salystyrǵanda 1,2 esege artyq.
Deıturǵanmen, aýdannyń jalpy oblys kólemindegi úlesi 8 paıyzdan shamaly ǵana artyq. Oblys ákimi osy oraıda, atalǵan aımaqqa ınvestısıa aǵynyn arttyrý qajettigin atap ótti.
– Búgingi kúni iske asqan 20 shaqty joba bolsa, sonyń ishinde «Jetisý energıasy» JSHS-niń qýaty 60 MVt Shelek jel elektr stansıasy jaqynda iske qosylǵany barshaǵa málim. Jobaǵa tartylǵan ınvestısıa kólemi – 37,4 mlrd. teńgeni quraıdy. Sáıkesinshe, 30 jumys orny qurylǵan bolatyn, – dedi óz sózinde Marat Sultanǵazıev.
Investısıalyq jobalar aımaqtyń áleýmetin jaqsartýǵa úlken úles qosady degen óńir basshysy «Jeruıyq Energo» seriktestigi Shelek dálizinde qýattylyǵy 50 MVt jel elektr stansıasynyń jáne ónimdiligi 7 myń tonnadan astam «Frosko» jemis-kókónis ónimderin óndirý, tereń muzdatý jáne saqtaý zaýytynyń qurylysy júrip jatqanyn kezdesý barysynda málim etti.
Eńbekishqazaq aýdanyndaǵy 4 kásiporynnyń ónimdiligi oblystaǵy ónerkásip óniminiń 72 paıyzyn quraıdy. Jalpy aýdanynda ónerkásip salasynda 137 kásiporyn jumys isteıdi, onyń 89-y óńdeý ónerkásibinde, al qalǵan 48-i taý-ken ónerkásibinde jumystaryn jalǵasytyryp jatyr. Negizinen aýdan ónerkásip óndirisi boıynsha aýdan 5-shi orynda tur.
Oblys ákimi aýdannyń negizgi ónerkásiptik kásiporyndary «Fýd Master kompanıasy» jáne «Adal sút» sút ónimderin óndiretin zaýyttarynyń aıaq alysyna toqtaldy. Búginde qos zaýyttyń jumys júktemesi 90%-dan asady eken.
Sonymen qatar óńirde sharap, alkogóldik sýsyndar, shyryndar shyǵarýmen «Gold Prodýkt» jáne «Vınzavod Dıonıs» sıaqty iri kásiporyndar aınalysady. Bul zaýyttardyń júktemesi shamamen 30-40%-dy quraıdy.
– Aýdandaǵy 4 kásiporynnyń ónim kólemi oblystyń jalpy ónerkásip óniminiń 72 paıyzyn nemese úshten ekisine jýyǵyn quraıdy. Sondyqtan ózimniń orynbasarym Arslan Dandybaevqa qaıta óńdeý kásiporyndaryn tolyq júkteý maqsatynda aýyl sharýashylyǵy taýar óndirýshilerin qoldaý jáne yntalandyrý, sonymen birge satý naryqtary izdestirý jumystaryn kúsheıtýdi tapsyramyn, – dedi Marat Eleýsizuly.
Ekonomıkanyń turaqtylyǵyn qamtamasyz etýdiń mańyzdy faktorlarynyń biri shaǵyn jáne orta bıznesti damytý bolyp tabylady. Oblysta 105,0 myńǵa jýyq shaǵyn jáne orta bıznes sýbektileri jumys istep tursa, onyń 21 myńǵa jýyǵy Eńbekshiqazaq aýdanynda nemese oblystyń besten bir bóligi, munda 34,5 myń adam jumyspen qamtylǵan.
Marat Sultanǵazıev oń dınamıkaǵa qaramastan, aǵymdaǵy jyldyń qańtar-tamyzynda shaǵyn jáne orta bıznes sýbektilerinen búdjetke túsetin túsimder nebári 1,2%-ǵa óskenin tilge tıek etti. Onyń aıtýynsha, halyq tyǵyz ornalasqan aımaq úshin bul óte az kórsetkish.
Sondyqtan oblys ákimi, jergilikti atqarýshy bılik halyqtyń onyń ishinde jastar arasynda kásipkerlik negizderine úıretý, shaǵyn nesıeler men granttar alý boıynsha túsindirý jumystaryn júrgizýi qajettigin eskertti.
