Premer-mınıstr Oljas Bektenov Prezıdenttiń tapsyrmasyn oryndaý aıasynda ádilet organdaryn sıfrlandyrý máseleleri boıynsha jıyn ótkizdi, dep habarlaıdy Dalanews.kz.
Onda quqyqtyq júıeniń negizgi baǵyttaryna sıfrlyq sheshimderdi engizý qarqynyn pysyqtaý, atqarýshylyq is júrgizýdiń ashyqtyǵy men tıimdiligin arttyrý, sot-saraptama qyzmetin jańǵyrtý jáne halyqtyń quqyqtyq kómekke qoljetimdiligin keńeıtý jónindegi sharalar qaraldy.
Oljas Bektenov sıfrlandyrý men jasandy ıntellekt elementterin engizý barlyq salanyń damý tıimdiligin arttyrýda mańyzdy ról atqaratynyn atap ótti.
«Memleket basshysy kúni keshe iske qosqan sýperkompúter elimizdegi sıfrlyq damýdyń jańa paraǵyn ashyp otyr. Bul - Ortalyq Azıadaǵy alǵashqy sýperkompúterlik klaster, sondaı-aq, aımaqtaǵy eń qýatty eseptep shyǵarý qurylǵysy. Onyń múmkindikteri memlekettik organdar, ǵylymı ınstıtýttar, joǵary oqý oryndary men bıznes úshin qoljetimdi bolmaq. Sondyqtan barlyq vedomstvolar osy baǵyttaǵy jumysty jandandyrýy tıis», — dep atap ótti Oljas Bektenov.
Jıynda ádilet mınıstri Erlan Sársembaev salanyń sıfrlyq transformasıasy jáne jańa servısterdi engizý týraly baıandama jasady.
Onyń aıtýynsha, «E-notarıat» júıesinde 2025 jyldyń 1 sáýirinen bastap «Taraptardyń jeke kabıneti» paıda boldy. Fýnksıa boryshkerge atqarýshy jazbaǵa onlaın rejımde kelisim nemese qarsylyq bildirýge múmkindik beredi. Bıometrıalyq sáıkestendirý jáne aýmaqtylyqtyń saqtalýyn baqylaý qamtamasyz etiledi. Osy servısti engizýdiń arqasynda 450 myńnan astam azamat habarlama aldy, onyń ishinde 43 myńnan astamy qarsylyq bildirý múmkindigin paıdalandy. Nátıjesinde osy baǵyt boıynsha shaǵymdar sany 20%-ǵa qysqardy.
Atqarýshylyq is júrgizý salasynda «Sıfrlyq asıstent» kómekshisi engizildi. Júıe qaýlylardy baqylaýǵa jáne qaryzdy onlaın tóleýge múmkindik beredi, jeke sot oryndaýshylary (JSO) úshin oryndaý merzimi týraly eske salý fýnksıasy engizildi. Sonymen birge JSO-lar arasynda atqarýshylyq qujattardy avtomatty túrde bólý tetigi iske qosyldy, bul zańsyz ýaǵdalastyqtar múmkindigin boldyrmaıdy jáne ákimshilik júktemeni azaıtady.
Erlan Sársembaev sondaı-aq «E-Saraptama» júıesinde tiri adamdardy kýálandyrý boıynsha pılottyq modýl iske qosylǵanyn habarlady. Mundaı sıfrlyq sheshim uıǵarym berýdi jáne tekserý shablondaryn paıdalanýdy avtomattandyrý esebinen sot saraptamalarynyń sapasyn arttyrýǵa baǵyttalǵan. Sonymen qatar bul modýldiń adamı faktordy azaıtý jáne ashyqtyqty arttyrý maqsatynda jasandy ıntellekt fýnksıalaryn paıdalanatyn jańa nusqasy ázirlenýde.
Halyqqa quqyqtyq kómek kórsetý sheńberinde osy jyldyń mamyr aıynan bastap «Ádilet» jáne «E-Zań kómegi» júıelerinde jasandy ıntellekt bazasynda «Sıfrlyq konsýltant» iske qosylǵany atap ótildi. Servıs azamattarǵa tıptik úlgidegi quqyqtyq suraqtar boıynsha avtomatty túrde aqyl-keńes beredi, osylaısha memlekettik organdardyń qyzmetkerlerine túsetin júktemeni azaıtady.
Sondaı-aq quqyqtyq normalar shyǵarmashylyǵy salasynda da sıfrlyq sheshimder ázirlenýde. Mınıstrlik avtorlyq quqyqtardy ujymdyq negizde basqarý úshin zıatkerlik menshik boıynsha Biryńǵaı sıfrlyq platforma qurý týraly zań jobasyna bastamashylyq jasady. Servıstiń tusaýkeseri 2026 jylǵa josparlanǵan.
Premer-mınıstr ádilet organdarynyń elimizdiń quqyq júıesindegi mańyzdy rólin erekshe atap ótti. Quqyqtyq rásimderdiń ashyqtyǵyn, qoljetimdiligi men jedeldigin arttyratyn zamanaýı quraldarsyz tıimdi quqyq qoldaný praktıkasyn júzege asyrý múmkin emestigi atap ótildi. Bul salada sıfrlyq sheshimderdi engizý Prezıdent Qasym-Jomart Toqaev jarıalaǵan «Zań jáne tártip» tujyrymdamasy aıasynda erekshe mańyzǵa ıe.
«Memleket basshysy barlyq salalardy sıfrlandyrýdyń tutas júıesin qurý qajettigin atap ótti. Úkimet memlekettik organdarda jasandy ıntellekt tehnologıasyn engizýge kiristi. Bul jumys barlyq jerde júrgizilýde. Ádilet organdaryn sıfrlandyrý – búginde quqyqtyq júıeni reformalaýdyń negizgi baǵyttarynyń biri jáne zań ústemdigin qamtamasyz etýdiń mańyzdy quraly. Bizge jedel, ashyq jáne tıimdi quqyqtyq sheshimder qajet», — dep atap ótti Oljas Bektenov.
Premer-mınıstr sıfrlyq sheshimderdi júzege asyrý adam ıgiligine baǵyttalǵan qaǵıdatqa negizdelýi tıis ekendigine nazar aýdardy. Bul azamattardyń memleketpen ózara is-qımylyn jeńildetýge, rásimderdiń ashyqtyǵyn arttyrýǵa jáne azamattardyń quqyqtaryn senimdi qorǵaýdy qamtamasyz etýge múmkindik beredi.
Jıyn qorytyndysy boıynsha jasandy ıntellektti qoldanýdy keńeıtýge, jańa sıfrlyq sheshimderdi engizýge jáne ádilet salasyndaǵy zańnamalyq bastamalardy ilgeriletýge baǵyttalǵan tapsyrmalar berildi.
