«Óner ortalyǵynda» oblys ákimi Nurlybek Nálibaevtyń qatysýymen sý, balyq sharýashylyǵy, veterinariia qyzmetkerleri kúnine orai saltanatty shara ótti. Oǵan QR Parlamenti Májilisiniń depýtattary Murat Ergeshbaev, Murat Ábenov, quqyq qorǵaý organdarynyń basshylary, ziialy qaýym ókilderi men sala qyzmetkerleri qatysty,- dep habarlaidy Dalanews.kz
Aimaq basshysy sý, balyq, mal sharýashylyǵy jáne veterinariia salalarynda atqarylǵan jumystardy saralap, jinalǵan jurtshylyqty kásibi merekemen quttyqtady.
«Prezidentimiz Qasym-Jomart Kemeluly 2025 jyldy «Jumysshy mamandyqtary jyly» dep jariialap, «Biz jumysshy mamandyqtaryn dáripteý arqyly qoǵamda eńbekqor jáne naǵyz maman bolý ideiasyn nasihattaimyz!
Adal ári tabandy eńbegimen tabysqa jetken adamdar qashanda qurmetti, syily bolýy kerek» dedi. Bul - ekonomikalyq turaqtylyq pen áleýmettik progrestiń basty faktory retinde jumysshy kásipteriniń rólin kúsheitýdegi strategiialyq qadam.
Kúni keshe Prezidentimiz Qasym-Jomart Kemeluly sý sharýashylyǵy qyzmetkerlerin Aqordada qabyldap, memlekettik nagradalar tabystady. Saltanatty qabyldaýda jerlesterimiz, sala ardageri Sultanbek Táýipbaev «Parasat» ordenimen, «Shielisýshar» óndiristik ýchaskesiniń basshysy Dihan Áýbákirov, «Qyzylorda sý toraby» óndiristik ýchaskesiniń aǵa injener-gidrotehnigi Maqsut Óteýliev «Qurmet» ordenimen nagradtaldy. Bul - aimaǵymyzdaǵy sý sharýashylyǵy salasynda atqarylǵan jumystarǵa berilgen joǵary baǵa.
Alashtyń anasy atanǵan Syr eli eńbegimen elge syily, ómir joly jas urpaqqa ónege bolǵan abzal da adal jandarǵa, eńbek adamdaryna kende emes. Biz eńbekkerlerge laiyqty qurmet kórsetip, ǵibratty ǵumyryn jastarǵa úlgi-ónege etýdi dástúrge ainaldyryp kelemiz. Bul - bizdiń basty paryzymyz», - dedi Nurlybek Mashbekuly.
Saltanatty sharada «Qurmet» ordenimen sý sharýashylyǵy salasynyń ardageri Begesh Jaqyp, «Eren eńbegi úshin» medalimen «Qazaly sý toraby» óndiristik ýchaskesiniń basshysy Bolat Aserbaev , «Sý sharýashylyǵy salasynyń eńbek sińirgen qairatkeri» qurmetti ataǵymen ardager Ádilhan Qarlyhanov marapattaldy.
Salanyń damýyna eleýli úles qosqan birqatar qyzmetkerge QR Premer-ministriniń Alǵys haty, «Balyq sharýashylyǵy salasyna eńbek sińirgen qyzmetker» qurmetti ataǵy, «Aýyl sharýashylyǵy salasynyń úzdigi» tósbelgisi, «Eńbek ardageri» medali, «Sý sharýashylyǵynyń ardageri» jáne «Qazaqstan Respýblikasy sý sharýashylyǵynyń úzdigi» tósbelgisi tabystaldy.
Sonymen qatar, Aýyl sharýashylyǵy, Sý resýrstary jáne irrigatsiia ministrleriniń Qurmet gramotasy men Alǵys haty, oblys ákiminiń Alǵys haty tabys etildi.
Is-sharada 42 qyzmettik avtokólik pen 65 arnaiy tehnikanyń kilti atalǵan salalardyń mekemelerine berildi.
