Qazaqstanda ánshiler endi óz týyndylary qaida qoiylyp jatqanyn jáne aýdarylyǵan syiaqy somasyn onlain qadaǵalap otyra alady. Bul týraly búgin Premer-ministr Oljas Bektenovtyń Prezidenttiń tapsyrmasyn oryndaý aiasynda ádilet organdaryn tsifrlandyrý máseleleri boiynsha ótkizgen jiyny barysynda málim boldy, dep habarlaidy Dalanews.kz.
Quqyqtyq normalar boiynsha shyǵarmashylyq salasynda da tsifrlyq sheshimder ázirlenýde. Ádilet ministrligi avtorlyq quqyqtardy ujymdyq negizde basqarý úshin ziiatkerlik menshik boiynsha Biryńǵai tsifrlyq platforma qurý týraly zań jobasyna bastamashylyq jasady. Servis 2026 jyly iske qosylady dep josparlanǵan.
Ádilet vitse-ministri Botagóz Jaqsylyqovanyń aitýynsha, ol quqyq ieleriniń avtorlyq jáne sabaqtas quqyqtardy basqaratyn uiymdarmen ózara is-qimylyn ózgertýge arnalǵan. Iaǵni, qural avtorlar men kontent jasaýshylarǵa onlain rejimde óz týyndylary qaida qoiylyp jatqanyn, syiaqylardyń eseptelýi men onyń bólinisin baqylaýǵa, sondai-aq ashyq esep alýǵa múmkindik beredi.
"Búginde kóptegen avtorlar, olardyń muragerleri tiisti syiaqylar tólenbeitindigine kóptep shaǵymdanady. Tsifrlyq platformany engizý, bir jaǵynan, atalǵan protsesti avtomattandyrýǵa jáne ony avtorlar, olardyń muragerleri úshin ashyq etýge múmkindik beredi. Olar qansha ret, qai jerde jáne qai shyǵarmanyń oryndalǵanyn kóre alady . Ekinshi jaǵynan, dámhana, meiramhana ieleriniń de múddeleri qorǵalady, olar qandai da bir týyndyny qansha ret oinatýǵa bolatynyn jáne qandai kólemde syiaqy tóleý kerektigin naqty bilýi kerek", - deidi Botagóz Jaqsylyqova.
Aita ketsek, atalǵan jiynda Oljas Bektenov tsifrlandyrý men jasandy intellekt elementterin engizý barlyq salanyń damý tiimdiligin arttyrýda mańyzdy ról atqaratynyn atap ótti.
"Memleket basshysy kúni keshe iske qosqan sýperkompiýter elimizdegi tsifrlyq damýdyń jańa paraǵyn ashyp otyr. Bul - Ortalyq Aziiadaǵy alǵashqy sýperkompiýterlik klaster, sondai-aq, aimaqtaǵy eń qýatty eseptep shyǵarý qurylǵysy. Onyń múmkindikteri memlekettik organdar, ǵylymi institýttar, joǵary oqý oryndary men biznes úshin qoljetimdi bolmaq. Sondyqtan barlyq vedomstvolar osy baǵyttaǵy jumysty jandandyrýy tiis", — dedi Oljas Bektenov.
