Qaıtarylǵan aktıvterdi basqarý kompanıasy koleksıalyq monetalar men zergerlik buıymdardy satýǵa qoıdy. Lottardyń jalpy bastapqy baǵasy — 67 339 496 teńge, dep habarlaıdy Dalanews.kz.

Nege.kz telegram arnasynyń málimetinshe, satylymǵa shyǵarylǵan qundy zattardyń qatarynda “Salt-dástúrler, ulttyq oıyndar” serıasynan shyqqan kúmis monetalar bar. Atap aıtqanda, “Bata”, “Betashar” jáne birden tórt dana “Súıindir” monetasy, sondaı-aq eki dana “Shyńǵyshan” jáne bir dana 500 teńgelik “Troops of Chinggis Khan” monetasy usynylǵan.

Barlyq buıym jańa kúıinde saqtalǵan, kópshiligi túpnusqa qaptamasy men arnaıy qobdıshalarynda tur.

“Saýda memleketke qaıtarylǵan aktıvterdi iske asyrý aıasynda uıymdastyrylyp otyr. Bul buıymdardyń naqty qaıdan alynǵany resmı qujattarda kórsetilmegenimen, olar Kaırat Satybaldymen baılanysty bolýy múmkin. 2024 jyly Qazaqstan Bas prokýratýrasy onyń jáne aınalasyndaǵy tulǵalardyń ıeliginen júzdegen mıllıon teńgege baǵalanatyn 174 sán-saltanat buıymy — eksklúzıvti áshekeıler, brendtik saǵattar men koleksıalyq monetalar tárkilengenin habarlaǵan edi”, — deıdi derekkóz.