قايتارىلعان اكتيۆتەردى باسقارۋ كومپانياسى كوللەكسيالىق مونەتالار مەن زەرگەرلىك بۇيىمداردى ساتۋعا قويدى. لوتتاردىڭ جالپى باستاپقى باعاسى — 67 339 496 تەڭگە، دەپ حابارلايدى Dalanews.kz.
Nege.kz تەلەگرام ارناسىنىڭ مالىمەتىنشە، ساتىلىمعا شىعارىلعان قۇندى زاتتاردىڭ قاتارىندا “سالت-داستۇرلەر، ۇلتتىق ويىندار” سەرياسىنان شىققان كۇمىس مونەتالار بار. اتاپ ايتقاندا، “باتا”، “بەتاشار” جانە بىردەن ءتورت دانا “ءسۇيىندىر” مونەتاسى، سونداي-اق ەكى دانا “شىڭعىسحان” جانە ءبىر دانا 500 تەڭگەلىك “Troops of Chinggis Khan” مونەتاسى ۇسىنىلعان.
بارلىق بۇيىم جاڭا كۇيىندە ساقتالعان، كوپشىلىگى ءتۇپنۇسقا قاپتاماسى مەن ارنايى قوبديشالارىندا تۇر.
“ساۋدا مەملەكەتكە قايتارىلعان اكتيۆتەردى ىسكە اسىرۋ اياسىندا ۇيىمداستىرىلىپ وتىر. بۇل بۇيىمداردىڭ ناقتى قايدان الىنعانى رەسمي قۇجاتتاردا كورسەتىلمەگەنىمەن، ولار كايرات ساتىبالدىمەن بايلانىستى بولۋى مۇمكىن. 2024 جىلى قازاقستان باس پروكۋراتۋراسى ونىڭ جانە اينالاسىنداعى تۇلعالاردىڭ يەلىگىنەن جۇزدەگەن ميلليون تەڭگەگە باعالاناتىن 174 ءسان-سالتانات بۇيىمى — ەكسكليۋزيۆتى اشەكەيلەر، برەندتىك ساعاتتار مەن كوللەكسيالىق مونەتالار تاركىلەنگەنىن حابارلاعان ەدى”، — دەيدى دەرەككوز.
