Almatydaǵy №1 oblystyq balalar úiiniń tárbielenýshileri Qonaev qalasyna kóshýge qarsy ekenin bildirip, beineúndeý jariialady,- dep habarlaidy Dalanews.kz
Olardyń aitýynsha, buǵan deiin Almaty oblysynyń ákimi Marat Sultanǵazievpen, Bilim basqarmasynyń ókilderimen jáne Bala quqyqtary jónindegi ýákil Dinara Zákievamen kezdesý ótken. Sol kezde sheneýnikter mekemeniń kóshirilmeitinine ýáde bergen.
"Balalar úii sol ornynda qalady degen bolatyn. Biraq úsh ai ótti, taǵy da kóshirý týraly áńgime bastalyp ketti. Tipti balalar úiin Qonaevqa kóshirý týraly buiryq shyqqanyn kórdik. Nelikten? Bul qandai sheshim? Sheneýnikter, ákimder, jaýapty tulǵalar, balalardy jaiyna qaldyryńyzdar", – dedi tárbielenýshiler óz úndeýinde.
Sonymen qatar olar Qonaev qalasyndaǵy jańa ǵimarattyń mańynda sapaly meditsinalyq mekemelerdiń joq ekenin aityp, alańdaýshylyq bildirdi.
"Biz búkil balalar úiiniń atynan zamanaýi, otbasylyq úlgidegi mekeme suraimyz. Biz bai adamdar siiaqty kóp nárse talap etip otyrǵan joqpyz", – delingen úndeýde.
Aita keteiik, Almatydaǵy Bostandyq aýdanyndaǵy Baǵanashyl shaǵynaýdanynda ornalasqan №1 oblystyq balalar úiine qatysty taǵy da daý shyqty. Biyl naýryzda osy mekemeniń tárbielenýshileri ózderin Almatydan Qonaev qalasyna kóshirmek bolǵan biliktiń sheshimine qarsylyq tanytqan edi. Qoǵam belsendileri bolsa, "ákimdik balalar úii ornalasqan baǵaly jer telimin qurylys kompaniialarynyń birine berip, onyń ornyna turǵyn úi keshenin salǵysy keledi" dep dabyl qaqqan bolatyn.
Jaǵdai qoǵamdyq narazylyqqa ulasqan soń Almaty oblysynyń ákimi Marat Sultanǵaziev arnaiy málimdeme jasap, "Almatyda oqyp jatqan balalardyń ornynan qozǵalmaitynyn, sebebi bul olardyń beiimdelýi men qoǵamǵa aralasýyna keri áser etetinin" aitqan.
Onyń sózinshe, balalardyń ózderi de Almatydan ketkisi kelmeitinin jetkizgen. Ákimdik tipti bul sheshimdi qabyldaý kezinde tárbielenýshilerdiń pikirin basty nazarǵa alǵanyn basa aitqan edi. Osylaisha oblys ákimdigi bastapqy ustanymynan sheginip, balalar úii burynǵy ornynda qalady, al Qonaev qalasynda tek jańadan balalardy qabyldaityn ortalyq ashylady degen málimdeme jasaǵan.
Alaida úsh ai ótpei jatyp, depýtat Baqytjan Bazarbek áleýmettik jelide tosyn qujat jariialady. 2025 jyly 10 shildedi Almaty oblysynyń bilim basqarmasy "Arnaiy áleýmettik qyzmetterge muqtaj balalardy qoldaý jónindegi oblystyq ortalyqtyń mekenjaiyn ózgertý týraly" buiryq shyǵarǵan eken. Iaǵni balalar úiiniń burynǵy ornynan Qonaevqa kóshý máselesi qaitadan kún tártibine shyqqan.
