Túrkistan oblysy, Sairam aýdany, Aqsýkent aýyl okrýginde 80 páterli turǵyn úidiń qurylysy júrgizilýde. Sonyń 32 páteri búgin paidalanýǵa tapsyryldy,- dep habarlaidy Dalanews.kz
Túrkistan oblysynyń ákimi Nuralhan Kósherov Sairam aýdany, Aqsýkent aýyl okrýgine arnaiy baryp, turǵyndardyń qýanyshyn bólisti. Turǵyn úi kezeginde turǵan baspanaǵa muqtaj otbasylarǵa arendalyq páter kiltterin tabystap, izgi tilegin jetkizdi.
– Búgin biz mańyzdy áleýmettik jobalardyń biri – arendalyq turǵyn úidiń ashylý saltanatynda bas qosyp otyrmyz. Bul — aýyl turǵyndarynyń ál-aýqatyn arttyrý jolynda qolǵa alynǵan naqty isterdiń nátijesi. Memleket basshysynyń tapsyrmasyna sáikes, elimizde azamattardy baspanamen qamtý — strategiialyq basym baǵyttardyń biri. Oblysta turǵyn úige degen suranys joǵary. Osy suranysty kezeń-kezeńmen sheshý maqsatynda memleket tarapynan naqty sharalar qabyldanyp keledi. 2018–2024 jyldar aralyǵynda oblys kóleminde 7,7 myń otbasy turǵyn úimen qamtamasyz etilse, sonyń ishinde Sairam aýdanynda 159 otbasy qonys toiyn toilady. Al búgin taǵy 32 otbasy jańa páterlerge qol jetkizdi. Jańa páterler — turǵyndarymyzdyń ómirine jailylyq, turaqtylyq jáne jańa úmit syilasyn! – degen Nuralhan Oralbaiuly jurtshylyqpen birge páterlerdi aralap shyqty.
Bul turǵyn úiler kópbalaly jáne tolyq emes otbasylarǵa, múgedektigi bar azamattar men jetim balalarǵa úlestirildi.
Eki qabatty 6 turǵyn úi 1,1 gektar aýmaqta ornalasqan. Onyń ishinde, 20 páter – 1 bólmeli, 40 páter – 2 bólmeli jáne 20 páter – 3 bólmeli. Nysan qurylysyn «Turǵyn úi-mommýnaldyq infraqurylymdy damytýdyń 2023-2029 jyldarǵa arnalǵan tujyrymdamasy» aiasynda 2024 jyly jeke investor qolǵa alyp, biyl paidalanýǵa tapsyrdy.
Qazirgi tańda oblys kóleminde 69 myń azamat turǵyn úi kezeginde tirkelse, sonyń 6 paiyzy (4 251 azamat) Sairam aýdanynyń turǵyndary. Aýdandaǵy baspana máselesin sheshý maqsatynda Aqsýkent jáne Aqbastaý aýylynda eki qabatty 96 páterli turǵyn úidi satyp alý josparlanyp otyr.
Túrkistan oblysynda turǵyndardy baspanamen qamtý baǵytynda aýqymdy jobalar júzege asyrylyp jatyr. Júieli jumystardyń nátijesinde oblys ortalyǵy men aýdandarda turǵyn úiler salynyp, baspana kezeginde turǵan azamattarǵa paidalanýǵa berilýde.
