تۇركىستان وبلىسى، سايرام اۋدانى، اقسۋكەنت اۋىل وكرۋگىندە 80 پاتەرلى تۇرعىن ءۇيدىڭ قۇرىلىسى جۇرگىزىلۋدە. سونىڭ 32 پاتەرى بۇگىن پايدالانۋعا تاپسىرىلدى،- دەپ حابارلايدى Dalanews.kz
تۇركىستان وبلىسىنىڭ اكىمى نۇرالحان كوشەروۆ سايرام اۋدانى، اقسۋكەنت اۋىل وكرۋگىنە ارنايى بارىپ، تۇرعىنداردىڭ قۋانىشىن ءبولىستى. تۇرعىن ءۇي كەزەگىندە تۇرعان باسپاناعا مۇقتاج وتباسىلارعا ارەندالىق پاتەر كىلتتەرىن تابىستاپ، ىزگى تىلەگىن جەتكىزدى.
– بۇگىن ءبىز ماڭىزدى الەۋمەتتىك جوبالاردىڭ ءبىرى – ارەندالىق تۇرعىن ءۇيدىڭ اشىلۋ سالتاناتىندا باس قوسىپ وتىرمىز. بۇل — اۋىل تۇرعىندارىنىڭ ءال-اۋقاتىن ارتتىرۋ جولىندا قولعا الىنعان ناقتى ىستەردىڭ ناتيجەسى. مەملەكەت باسشىسىنىڭ تاپسىرماسىنا سايكەس، ەلىمىزدە ازاماتتاردى باسپانامەن قامتۋ — ستراتەگيالىق باسىم باعىتتاردىڭ ءبىرى. وبلىستا تۇرعىن ۇيگە دەگەن سۇرانىس جوعارى. وسى سۇرانىستى كەزەڭ-كەزەڭمەن شەشۋ ماقساتىندا مەملەكەت تاراپىنان ناقتى شارالار قابىلدانىپ كەلەدى. 2018–2024 جىلدار ارالىعىندا وبلىس كولەمىندە 7،7 مىڭ وتباسى تۇرعىن ۇيمەن قامتاماسىز ەتىلسە، سونىڭ ىشىندە سايرام اۋدانىندا 159 وتباسى قونىس تويىن تويلادى. ال بۇگىن تاعى 32 وتباسى جاڭا پاتەرلەرگە قول جەتكىزدى. جاڭا پاتەرلەر — تۇرعىندارىمىزدىڭ ومىرىنە جايلىلىق، تۇراقتىلىق جانە جاڭا ءۇمىت سىيلاسىن! – دەگەن نۇرالحان ورالباي ۇلى جۇرتشىلىقپەن بىرگە پاتەرلەردى ارالاپ شىقتى.
بۇل تۇرعىن ۇيلەر كوپبالالى جانە تولىق ەمەس وتباسىلارعا، مۇگەدەكتىگى بار ازاماتتار مەن جەتىم بالالارعا ۇلەستىرىلدى.
ەكى قاباتتى 6 تۇرعىن ءۇي 1،1 گەكتار اۋماقتا ورنالاسقان. ونىڭ ىشىندە، 20 پاتەر – 1 بولمەلى، 40 پاتەر – 2 بولمەلى جانە 20 پاتەر – 3 بولمەلى. نىسان قۇرىلىسىن «تۇرعىن ءۇي-موممۋنالدىق ينفراقۇرىلىمدى دامىتۋدىڭ 2023-2029 جىلدارعا ارنالعان تۇجىرىمداماسى» اياسىندا 2024 جىلى جەكە ينۆەستور قولعا الىپ، بيىل پايدالانۋعا تاپسىردى.
قازىرگى تاڭدا وبلىس كولەمىندە 69 مىڭ ازامات تۇرعىن ءۇي كەزەگىندە تىركەلسە، سونىڭ 6 پايىزى (4 251 ازامات) سايرام اۋدانىنىڭ تۇرعىندارى. اۋدانداعى باسپانا ماسەلەسىن شەشۋ ماقساتىندا اقسۋكەنت جانە اقباستاۋ اۋىلىندا ەكى قاباتتى 96 پاتەرلى تۇرعىن ءۇيدى ساتىپ الۋ جوسپارلانىپ وتىر.
تۇركىستان وبلىسىندا تۇرعىنداردى باسپانامەن قامتۋ باعىتىندا اۋقىمدى جوبالار جۇزەگە اسىرىلىپ جاتىر. جۇيەلى جۇمىستاردىڭ ناتيجەسىندە وبلىس ورتالىعى مەن اۋدانداردا تۇرعىن ۇيلەر سالىنىپ، باسپانا كەزەگىندە تۇرعان ازاماتتارعا پايدالانۋعا بەرىلۋدە.
