Qazaqstan azamattyǵyna qabyldaý úshin memlekettik tildi, Konstitýtsiia negizderin jáne Qazaqstan tarihyn bilýge qoiylatyn talaptar ózgeredi, dep habarlaidy Dalanews.kz.
Respýblika azamattyǵy týraly zańnyń 17-babynyń 14-tarmaqshasyna sáikes, Qazaqstan azamattyǵyna qabyldaýdan nemese azamattyqty qalpyna keltirýden bas tartýǵa negiz bar: eger azamattyq alýǵa nietti tulǵa memlekettik tildi bastaýysh deńgeide, Qazaqstan Respýblikasy Konstitýtsiiasynyń negizderin jáne Qazaqstan tarihyn ýákiletti organ belgilegen kólemde bilmese, onyń ótinishi qabyldanbaidy.
Osy talaptarǵa qatysty ózgeris ministr buiryǵyna engizilip otyr. Onda bylai delingen:
"Qazaqstan Respýblikasynyń azamattyǵyna qabyldaý nemese azamattyǵyn qalpyna keltirý kezinde memlekettik tildi bastaýysh deńgeide bilýge – keminde 15 ball, Konstitýtsiia negizderi boiynsha – keminde 20 ball, al Qazaqstan tarihy boiynsha – keminde 15 ball jinaý qajettigin bekitý", - delingen qujatta.
Joba avtorlarynyń aitýynsha, bul ózgeris azamattyq alýǵa nietti úmitkerler úshin ár pán boiynsha suraqtardyń sany men kúrdelilik deńgeiin teńestirýge, sondai-aq ótý shegin 10%-ǵa tómendetýge múmkindik beredi.
Qujatta kórsetilgendei, jobany qabyldaý áleýmettik-ekonomikalyq, quqyqtyq nemese ózge de keri áserlerge ákelmeidi jáne ulttyq qaýipsizdikke de ziian tigizbeidi.
