Reseidiń Samara qalasyndaǵy iri munai tasymaldaý torabynda bolǵan órt Qazaqstan munaiyn eksporttaýdyń bir baǵytyna kedergi keltirdi. 2 qarashaǵa qaraǵan túni ushqyshsyz ushý apparattarynyń shabýylynan keiin Resei «Atyraý – Samara» munai qubyry arqyly qazaqstandyq munaidy qabyldaýdy ýaqytsha toqtatty, dep habarlaidy dalanews.kz.
2 qarashaǵa qaraǵan túni drondar Samara óndiristik-dispetcherlik torabyna shabýyl jasaǵan. Máskeý ýaqytymen saǵat 04:09-da osy baǵyt boiynsha qazaqstandyq munaidy tasymaldaý toqtatyldy. Qazaqstannyń Energetika ministrligi munai qabyldaýdyń ýaqytsha toqtatylǵanyn rastady. Qazir mamandar shabýyldan keiin jabdyqtardyń jai-kúiin tekserip jatyr.
Ministrlik málimetinshe, atalǵan baǵyt boiynsha munai qabyldaý jaqyn arada qaita jandanýy múmkin. Biylǵy jyldyń alǵashqy toǵyz aiynda Qazaqstan «Atyraý – Samara» munai qubyry arqyly 7,57 million tonna munai eksporttaǵan.
Samara munai torabyna shabýyl jiilegen
Bul – sońǵy bir aida Samara munai torabyna jasalǵan besinshi shabýyl. Buǵan deiin drondar 2, 7, 10 jáne 11 qazanda soqqy jasaǵan. «Samara» stantsiiasy «Transneft» kompaniiasyna tiesili. Ol Reseidegi munaidy aidaý jáne saqtaý boiynsha eń iri toraptardyń biri sanalady. Munda jalpy syiymdylyǵy 1,6 million tekshe metrden asatyn 71 munai rezervýary bar. Torapqa tórt munai qubyry jalǵanǵan.
Olardyń biri – kezinde Gýrev – Kýibyshev dep atalǵan «Atyraý – Samara» munai qubyry. Qazaqstan munaiy osy baǵyt arqyly Reseidiń magistraldyq qubyr júiesine qosylyp, odan ári syrtqy naryqtarǵa jetkiziledi. Aita keteiik, biyl tamyzda Kaspii qubyr konsortsiýmynda (KQK) týyndaǵan máselelerge bailanysty Qazaqstan «Atyraý – Samara» baǵyty arqyly munai tasymaldaý kólemin arttyrǵan bolatyn.
