Otbasy bank áielderge baspana alýǵa múmkindik beretin "Umai" ipotekalyq baǵdarlamasynyń ekinshi kezeńin iske qosty. Jobaǵa Aziia damý banki 20 mlrd teńge bóldi, dep habarlaidy dalanews.kz.
Baǵdarlama aiasynda qazaqstandyq áielder turǵyn úi satyp alý úshin 50 mln teńgege deiin nesie rásimdei alady. Qaryzdyń jyldyq mólsherlemesi 14,8 paiyzdy quraidy. Jyldyq tiimdi syiaqy mólsherlemesi 16,3–16,8 paiyz aralyǵynda belgilengen.
Almaty men Astanada baspana qunynyń keminde 20 paiyzyn bastapqy jarna retinde tóleý qajet. Ózge qalalarda bul kórsetkish 15 paiyzdan bastalady. Baǵdarlamaǵa qatysý úshin otbasynyń ortasha ailyq taza tabysy 1,25 mln teńgeden aspaýǵa tiis. Sondai-aq úmitker sońǵy alty aidaǵy resmi tabysyn rastaýy kerek.
"Umai" baǵdarlamasy arqyly jańadan salynǵan turǵyn úiden nemese qaitalama naryqtan páter satyp alýǵa bolady. Alaida ekinshi naryqtaǵy baspana ornalasqan ǵimarat 2016 jyldan erte salynbaýy qajet.
Ótinimdi Otbasy banktiń saity arqyly onlain berýge bolady. Budan bólek, bank konsýltantynyń kómegine júginý nemese bólimshege tikelei barý múmkindigi qarastyrylǵan.
Buǵan deiin baǵdarlamaǵa ótinim qabyldaý nebári jeti saǵat ishinde toqtatylǵan edi. 31 tamyzda bankke 855 ótinim túsip, bólingen 9 mlrd teńge limiti tolyq igerilgen. Endi Aziia damý banki baǵdarlamany jalǵastyrý úshin qosymsha 20 mlrd teńge bóldi.
