Jezqazǵandaǵy Janasova kóshesinde jylý qubyrlaryn aýystyrǵannan keiin asfalttyń sapasyz tóselgeni aityldy. Áleýmettik jeli qoldanýshylary jóndeý jumystaryna jaýapty merdigerlerdi ǵana emes, qala ákimi Murat Burmabaevty da synǵa aldy, dep habarlaidy dalanews.kz.
Gosrating paraqshasynda jariialanǵan jazbada Murat Burmabaevtyń buǵan deiin Sátbaev qalasyn basqarǵany, sol kezde de turǵyndar onyń jumysyna birneshe ret shaǵymdanǵany jazylǵan. Avtor Jezqazǵandaǵy merdigerler asfaltty talapqa sai tósemei jatqanyn aityp, qala basshylyǵynyń jumysty nege baqylamai otyrǵanyna nazar aýdarǵan.
Jezqazǵan qalasynyń qoǵamdyq keńes músheleri Janasova kóshesindegi jóndeý jumystaryn teksergen. Bul kóshede jylý qubyrlaryn aýystyrý kezinde trotýar men jol jabyny buzylǵan. Alaida keiingi qalpyna keltirý jumystary talapqa sai júrgizilmegen.
"Asfalt tóser aldynda jer daiyndalmaǵan. Astyna qiyrshyq tas salynbaǵan, bitým da jaǵylmaǵan. Asfalt topyraqtyń ústine tikelei tóselgen. Ony qolmen kótergende shań-topyraqpen birge ońai ajyrap jatyr", – dedi qoǵamdyq keńes ókili.
Jylý qubyrlaryn aýystyrý jumystaryn «Alprom» kompaniiasy júrgizgeni aityldy. Qoǵamdyq keńes músheleriniń pikirinshe, sapasyz tóselgen asfaltty tolyq alyp tastap, tehnologiialyq talaptarǵa sai qaita tóseý qajet.
Ázirge Jezqazǵan qalasynyń ákimdigi men merdiger kompaniia aitylǵan synǵa qatysty resmi túsinikteme bergen joq.
