Túrkistan oblysy Keles aýdanynda kóktemde sýǵa aǵyp ketken 8 jastaǵy Jannurdyń anasy áleýmettik jelide ulyn áli kúnge deiin kútip júrgenin jazdy. Balasynyń joǵalǵanyna jeti aidan assa da, anasy onyń aman oralatynynan úmit úzbegen.
Jannurdyń anasy áleýmettik jelidegi jazbasynda ulyn joǵaltqannan keiingi aýyr kúnderi men jan dúniesindegi tolǵanysyn bólisti. Onyń aitýynsha, balasynyń taǵdyry belgisiz kúide ómir súrý kún ótken saiyn qiyndai túsken.
"Balańnyń óli-tirisin bilmei ómir súrý qandai qiyn! Ne kúterińdi, ne úmit úzerińdi bilmeisiń. Sanamda san túrli oimen saǵat, minýt, sekýnd saiyn arpalysamyn. Bireý taýyp aldy, bireý ákeledi, bir jerde júr, múmkin esinen aiyrylyp qaldy degen oilarmen ómir súremin", – dep jazdy ol.
Eske salaiyq, oqiǵa 2026 jylǵy 23 naýryzda Túrkistan oblysy Keles aýdanyna qarasty Abai aýylynda bolǵan. Ekinshi synypta oqityn 8 jastaǵy Jannur aryqqa túsip ketken aiaq kiimin almaq bolǵan. Alaida sýǵa túsken sátte taiyp qulap, qatty aǵys balany Keles ózenine qarai alyp ketken.
Oqiǵadan keiin balany izdeýge qutqarýshylar, súńgýirler men eriktiler jumyldyryldy. Izdestirý jumystaryna drondar da paidalanyldy. Mamandar ózen boiy men oǵan jaqyn aýmaqtardy uzaq ýaqyt teksergenimen, Jannurdy tabý múmkin bolmady.
Keiin resmi izdestirý jumystary toqtatylǵan.
Anasy balasynyń taǵdyry áli belgisiz ekenin aityp, bir kúni úiine oralar degen senimmen ómir súrip júrgenin jetkizdi.
"Eń qiyny – balam qaitys boldy degendi sanama syidyra almaimyn. Múmkin, balam aman-esen, tiri keletin shyǵar dep aiqailaǵym keledi. Men áli de kútemin. Sensiz ótken 222 kún. Sensiz ótip jatqan meniń ómirim", – dep jazdy ol.
Jazba áleýmettik jeli qoldanýshylarynyń da júregin eljiretti. Kópshilik balasyn kútken anaǵa qoldaý bildirip, sabyr men kúsh-qýat tiledi.
