Densaýlyq saqtaý ministri Aqmaral Álnazarova Aqtaýda balanyń ákesi balalar hirýrgine shabýyl jasaǵan oqiǵaǵa qatysty pikir bildirdi. Onyń aitýynsha, meditsina qyzmetkeriniń kinási bolsa, ony tergeý anyqtaidy, dep habarlaidy dalanews.kz.
Jýrnalist ministrden dárigerlerdiń zańsyz áreketinen qoryqqan naýqastar 12 jylǵa deiin bas bostandyǵynan aiyrylý qaýpine bailanysty únsiz qalýy múmkin be dep surady.
Ministr dárigerdiń jumys ornynda kásibi mindetin atqaryp jatqan sátte oǵan kúsh qoldanýdy aqtaýǵa bolmaitynyn aitty.
«Adam jumys ornynda bolyp, óziniń kásibi mindetin atqaryp jatyr. Sol sátte oǵan shabýyl jasap, uryp-soǵyp, julqylaý durys dep oilaisyz ba?» – dedi ol.
Álnazarovanyń málimetinshe, atalǵan oqiǵa boiynsha qylmystyq is qozǵalǵan. Tergeý eki taraptyń da áreketine quqyqtyq baǵa beredi. Ministr sáýir aiynda Qazaqstanda meditsina qyzmetkerlerine shabýyl jasaǵany úshin jaýapkershilik kúsheitilgenin eske saldy. Qazir el boiynsha osy bappen 50-ge jýyq qylmystyq is qozǵalǵan.
«Eger tergeý barysynda dárigerdiń kinási anyqtalsa, onda keiin kóre jatarmyz», – dep tolyqtyrdy ministr.
Oqiǵa 31 qazanda bolǵan. Bala saǵat 15:40-ta ishiniń aýyrsynýyna jáne jalpy álsizdikke shaǵymdanyp, qabyldaý bólimine jetkizilgen. Kezekshi hirýrg ony qarap, qan taldaýyn jáne qursaq qýysynyń rentgenin taǵaiyndaǵan. Tekserý nátijesinde shuǵyl operatsiiany qajet etetin patologiia anyqtalmaǵan.
Oblystyq densaýlyq saqtaý basqarmasynyń nusqasy boiynsha, janjal dárigerdiń balanyń ata-anasyna tekserý nátijesin túsindirip, spazmolitik taǵaiyndaý qajettigin aitqan kezinde bastalǵan. Osy sátte balanyń ákesi agressiia tanytyp, ústeldi teýip, dárigerdi moinynan ustap, býyndyryp, qabyrǵaǵa iterip, urǵan.
Basqarma ókilderi beinebaqylaý kameralaryndaǵy jazbalardy zerdelegenin habarlady. Tekserý barysynda dáriger tarapynan meditsinalyq etika men deontologiia talaptarynyń buzylǵany nemese janjalǵa sebep bolýy múmkin áreketter anyqtalmaǵan. Oqiǵa kezinde qabyldaý bóliminde basqa patsientterdiń ata-analary da bolǵan.
