Qazaqstanda tegin berilýi tiis dárilerdi naýqastardyń óz qarajatyna satyp alýǵa májbúr bolýy - jol berýge bolmaityn jaǵdai. Bul týraly Úkimet otyrysynda premer-ministr Oljas Bektenov málimdedi, dep habarlaidy dalanews.kz.
Úkimet basshysy Densaýlyq saqtaý ministrligine dárilik preparattardyń sapasy men tiimdiligine qatysty azamattardyń shaǵymdaryn turaqty baqylaýdy tapsyrdy. Onyń aitýynsha, keibir dárilerdiń áseri tómen bolýy nemese janama áserler týyndaýy týraly ótinishter nazardan tys qalmaýy kerek.
Sonymen qatar Bektenov tegin dári-dármek alý tártibi azamattarǵa túsinikti ári qolaily bolýy qajet ekenin atap ótti. Ár patsient qandai preparatty tegin alýǵa quqyly ekenin, ony qaidan jáne qashan alýǵa bolatynyn, qiyndyq týyndasa qaida júginý keregin bilýi tiis.
Premer-ministr buryn qoldanǵan dárini basqa óndirýshiniń preparatyna aýystyrǵan jaǵdaida da onyń sebebi men jańa dárini qoldaný tártibi túsindirilýi qajet ekenin aitty. Bul ásirese uzaq ýaqyt nemese turaqty em qabyldaityn balalardyń ata-analary úshin mańyzdy.
Bektenovtiń pikirinshe, aqparattyń jetkiliksizdigi men ákimshilik rásimder aýyr dertke shaldyqqan naýqastarǵa kedergi bolmaýy kerek. Ol elektrondy retsept pen onlain rastaý júieleri engizilip jatqanyn eske salyp, tegin dári berýden bas tartý jaǵdailaryna jol bermeýdi tapsyrdy.
