Qazaqstanda 2026 jyldyń sońyna deiin mańyzdy metaldar qoryn basqarýdyń ulttyq júiesi iske qosylady. Bul týraly Premer-ministrdiń orynbasary – Ulttyq ekonomika ministri Serik Jumanǵarin málimdedi, dep habarlaidy dalanews.kz.
Úkimettiń josparyna sáikes, 2027 jyly «Jer qoinaýyn paidalanýdyń biryńǵai platformasy» geologiialyq derektermen tolyqtyrylady. Sonymen qatar geologiialyq barlaý jumystaryna ozyq tehnologiialar engizilip, tsifrlyq kartalar qoldanyla bastaidy.
Qytai men Ońtústik Koreia metaldar qoryn qalai basqarady?
Birqatar memleket mańyzdy metaldardyń strategiialyq qoryn qalyptastyrýdyń ózindik júiesin engizgen. Máselen, Qytai metaldar qoryn jer qoinaýynda saqtaidy. 2026 jyldyń mamyrynan bastap strategiialyq qorǵa engizilgen ken oryndaryn keminde bes jyl boiy igerýge tyiym salynǵan.
Al Ońtústik Koreia sirek metaldardyń qoryn tutyný kólemimen esepteidi. Eldiń maqsaty – 2031 jylǵa qarai sirek metaldardyń 100 kúndik qoryn qalyptastyrý. Qazir bul kórsetkish shamamen 57 kúndi quraidy. Sondai-aq Ońtústik Koreiada kompaniialar memlekettik rezervtegi metaldardy segiz kún ishinde alýǵa múmkindik alady.
Qazaqstanda ázirge qor kólemi naqtylanbaǵan
Qazaqstan ázirge mańyzdy metaldardy esepke alý men basqarýdyń ulttyq júiesin qalyptastyrý kezeńinde. Alaida elde naqty qansha metall qory jinalatyny ázirge belgisiz. Serik Jumanǵarin strategiialyq qorǵa qandai metaldar engiziletinin jáne olardyń kólemi tonnamen nemese eldiń tutyný qajettiligine shaqqandaǵy kún sanymen eseptele me degen máseleni naqtylamady.
