Қазақстанда 2026 жылдың соңына дейін маңызды металдар қорын басқарудың ұлттық жүйесі іске қосылады. Бұл туралы Премьер-министрдің орынбасары – Ұлттық экономика министрі Серік Жұманғарин мәлімдеді, деп хабарлайды dalanews.kz.
Үкіметтің жоспарына сәйкес, 2027 жылы «Жер қойнауын пайдаланудың бірыңғай платформасы» геологиялық деректермен толықтырылады. Сонымен қатар геологиялық барлау жұмыстарына озық технологиялар енгізіліп, цифрлық карталар қолданыла бастайды.
Қытай мен Оңтүстік Корея металдар қорын қалай басқарады?
Бірқатар мемлекет маңызды металдардың стратегиялық қорын қалыптастырудың өзіндік жүйесін енгізген. Мәселен, Қытай металдар қорын жер қойнауында сақтайды. 2026 жылдың мамырынан бастап стратегиялық қорға енгізілген кен орындарын кемінде бес жыл бойы игеруге тыйым салынған.
Ал Оңтүстік Корея сирек металдардың қорын тұтыну көлемімен есептейді. Елдің мақсаты – 2031 жылға қарай сирек металдардың 100 күндік қорын қалыптастыру. Қазір бұл көрсеткіш шамамен 57 күнді құрайды. Сондай-ақ Оңтүстік Кореяда компаниялар мемлекеттік резервтегі металдарды сегіз күн ішінде алуға мүмкіндік алады.
Қазақстанда әзірге қор көлемі нақтыланбаған
Қазақстан әзірге маңызды металдарды есепке алу мен басқарудың ұлттық жүйесін қалыптастыру кезеңінде. Алайда елде нақты қанша металл қоры жиналатыны әзірге белгісіз. Серік Жұманғарин стратегиялық қорға қандай металдар енгізілетінін және олардың көлемі тоннамен немесе елдің тұтыну қажеттілігіне шаққандағы күн санымен есептеле ме деген мәселені нақтыламады.
