Londonda Alatau City Investment Roundtable investitsiialyq dóńgelek ústeli ótti. Is-shara Alataý qalasyn damytýǵa halyqaralyq kapital tartýǵa baǵyttalǵan eýropalyq roýd-shoýdyń bastamasy boldy, dep habarlaidy dalanews.kz.
Investitsiialyq dóńgelek ústelge JPMorgan Chase, AstraZeneca, BP jáne Brookfield Asset Management kompaniialaryn qosa alǵanda, 70-ten astam kompaniia, investitsiialyq qor, bank jáne saraptamalyq uiymdardyń ókilderi qatysty. Qatysýshylarǵa Alatau City-di damytý tujyrymdamasy, qalanyń investitsiialyq múmkindikteri, perspektivaly infraqurylymdyq jobalar jáne olardy júzege asyrýǵa sheteldik kapitaldy tartý tetikteri tanystyryldy.
«Roýd-shoýdy álemdegi jetekshi qarjy jáne quqyq ortalyqtarynyń biri – Londonda bastaýymyz kezdeisoq emes. Ulybritaniia – bizdiń strategiialyq seriktesimiz. Alatau City – Prezident Qasym-Jomart Toqaevtyń bastamasymen júzege asyrylyp jatqan ulttyq joba. Biz Eýropa men Aziia arasyndaǵy ekonomikalyq ózara is-qimyldyń mańyzdy býynyna ainalýǵa tiis biznes, qarjy, tehnologiia jáne logistika salalarynyń jańa ortalyǵyn quryp jatyrmyz», – dedi Qanat Bozymbaev.
Dóńgelek ústel aiasynda «Alatau City Authority» arnaiy basqarý uiymynyń bas atqarýshy direktory Álisher Ábdiqadyrov qalany damytýdyń negizgi baǵyttaryn, onyń ishinde zamanaýi injenerlik jáne kólik infraqurylymyn, ónerkásiptik, iskerlik jáne logistikalyq aimaqtardy qurý josparlaryn tanystyrdy. Arup halyqaralyq injenerlik-konsaltingtik kompaniiasy qatysýshylardy keńistikti josparlaý jáne qalalyq infraqurylymdy damytý tásilderimen tanystyrdy. Al «Báiterek» holdingi investitsiialyq jobalardy qarjylandyrý quraldaryn usyndy.
Alatau City-diń basty artyqshylyqtarynyń biri – 2026 jylǵy 8 mamyrdaǵy Konstitýtsiialyq zańda kózdelgen arnaýly quqyqtyq rejim. Ol Angliia men Ýels quqyǵynyń qaǵidattaryn qoldaný múmkindigin, investitsiialardy qorǵaýdyń zamanaýi tetikterin jáne boljamdy iskerlik orta qalyptastyrýdy kózdeidi.
Norton Rose Fulbright, Reed Smith jáne Boies Schiller Flexner halyqaralyq zańgerlik kompaniialarynyń qatysýymen ótken saraptamalyq sessiiada investitsiia tartýdyń quqyqtyq tetikteri, memlekettik-jekeshelik áriptestik, halyqaralyq tórelik, tsifrlyq aktivterdi retteý jáne kommertsiialyq daýlardy sheshý máseleleri talqylandy. Sondai-aq aǵylshyn quqyǵynyń qaǵidattaryn qoldanýǵa negizdelgen Alatau City-diń mamandandyrylǵan investitsiialyq sotyn qurý perspektivalary qarastyryldy. Iskerlik baǵdarlama aiasynda London qor birjasynyń, Brookfield Asset Management, Société Générale, J.P. Morgan jáne Eýropalyq qaita qurý jáne damý bankiniń basshylyǵymen kelissózder júrgizildi. Taraptar institýtsionaldyq kapital tartý, jobalyq qarjylandyrý quraldaryn paidalaný jáne halyqaralyq qarjy uiymdaryn qalanyń energetikalyq, kólik jáne injenerlik infraqurylymyn damytýǵa qatystyrý múmkindikterin qarastyrdy.
Is-shara qorytyndysy boiynsha halyqaralyq seriktestermen jalpy investitsiialyq áleýeti $1,3 mlrd quraityn 9 kelisimge qol qoiyldy. Kelisimder infraqurylymdyq jáne investitsiialyq jobalardy qarjylandyrý, bilim berý jáne densaýlyq saqtaý infraqurylymyn damytý, sondai-aq halyqaralyq yntymaqtastyqty keńeitý baǵyttaryn qamtidy.
Atap aitqanda, University of Exeter, Brighton College jáne Repton Group qatysýymen bilim berý uiymdaryn ashý jobalaryn pysyqtaý kózdelgen. AstraZeneca jáne Crescent Meditours kompaniialarymen yntymaqtastyq meditsinalyq infraqurylymdy damytý, investitsiia tartý jáne ǵylymi tájiribe almasý máselelerin qamtidy.
Qazirgi ýaqytta Alatau City-diń investitsiialyq portfelinde jalpy quny shamamen $6,9 mlrd quraityn 67 joba bar. Olardy júzege asyrý nátijesinde 55 myńǵa jýyq jumys ornyn ashý kózdelgen. Sonymen qatar qalada energiiamen, sýmen jáne gazben jabdyqtaý, káriz jelileri men avtomobil joldaryn damytýǵa baǵyttalǵan 28 infraqurylymdyq joba boiynsha jumys júrgizilýde. Bul maqsatqa 35,3 mlrd teńge bólingen.
Investitsiialyq roýd-shoý aiasynda Ulybritaniianyń memlekettik organdary, qarjy institýttary jáne strategiialyq seriktester ókilderimen kelissózder jalǵasady. Eýropalyq roýd-shoýdyń kelesi kezeńi Germaniiada ótedi.
