Qyrǵyzstan astanasy Bishkekte 9 qazannan beri iz-túzsiz joǵalǵan 28 jastaǵy Hanel Jorobaevtyń máiiti tabyldy. Aldyn ala boljam boiynsha, ol shamamen 300 metr biiktikten qulaǵan bolýy múmkin, dep habarlaidy dalanews.kz.
Qaiǵyly jaǵdai týraly aqparatty Bishkek qalasynyń Oktiabr aýdandyq ishki ister basqarmasy rastady.
Politsiia málimetinshe, 2 qarasha kúni saǵat 10:27 shamasynda Kók-Jar aýylyndaǵy «Panorama» saiajai aýmaǵyna jaqyn taý eteginen er adamnyń denesi tabylǵany týraly habar túsken. Oqiǵa ornyna jedel tergeý toby jiberildi. Aldyn ala málimet boiynsha, máiitti Qyrǵyzstan Tótenshe jaǵdailar ministrliginiń qutqarýshylary anyqtaǵan.
300 metr biiktikten qulaǵan bolýy múmkin
Oqiǵa ornyn teksergen tártip saqshylary taý betkeiindegi izder men taptalǵan shópke nazar aýdarǵan.
Aldyn ala boljam boiynsha, er adam shamamen 300 metr biiktikten qulaǵan bolýy yqtimal. Mamandar máiittiń atalǵan jerde 10 kúnnen astam ýaqyt jatqanyn boljaidy.
Qazirgi ýaqytta marqumnyń denesi máiithanaǵa jetkizilip, sot-meditsinalyq saraptama taǵaiyndaldy. Ólimniń naqty sebebi saraptama qorytyndysynan keiin anyqtalady.
9 qazanda úiinen shyǵyp, oralmaǵan
Tergeý málimetinshe, Hanel Jorobaev 9 qazanda Bishkektiń Oktiabr aýdanyndaǵy Salqyn kóshesinde ornalasqan úiinen shyǵyp ketken.
Sol kúnnen bastap jaqyndary onymen bailanysa almaǵan. 10 qazanda politsiiaǵa onyń joǵalǵany týraly aryz túsip, izdestirý isi ashylǵan.
Birneshe apta boiy tártip saqshylary men týystary jigitti izdegenimen, nátijesinde onyń denesi tabyldy.
Anasy ulynyń ólimine qatysty kúdigin aitty
Haneldiń anasy qaiǵyly oqiǵanyń qalai bolǵanyna qatysty óz boljamyn jariialaǵan. Anasynyń paiymdaýynsha, uly joǵalǵan kúni Botanikalyq baq mańyna bir qyzben kezdesýge barýy múmkin.
Anasy qyzdyń jigittiń júrisindegi erekshelikten qorqyp, aǵasyn kómekke shaqyrýy yqtimal ekenin aitqan. Ol ulynyń bireýdiń qolynan qaza tabý múmkindigin de joqqa shyǵarmaidy.
Alaida bul – marqumnyń anasynyń jeke boljamy. Quqyq qorǵaý organdary onyń sózin resmi túrde rastaǵan joq. Qazirgi ýaqytta Hanel Jorobaevtyń ólimine qatysty barlyq mán-jai anyqtalyp jatyr.
