Qazaqstanda jumys isteý úshin shetelge shyǵatyn azamattardy esepke alý jáne olardyń eńbek qyzmetin baqylaý tetigi engiziledi. Bul shara Úkimettiń 2027–2029 jyldarǵa arnalǵan adam saýdasyna qarsy kúres jónindegi josparynda qamtylǵan, dep habarlaidy dalanews.kz.
Tiisti qaýlyǵa premer-ministr Oljas Bektenov 2026 jylǵy 28 qazanda qol qoidy. Qujat kúshine endi.
Shetelge jumysqa ketetinder qalai tirkeledi?
Josparǵa sáikes, 2027 jyldyń ekinshi toqsanynda shetelde jumys isteýge nietti qazaqstandyqtardy habarlama arqyly esepke alý júiesin iske qosý kózdelip otyr. Bul fýnktsiiany migration.enbek.kz portalynda tehnikalyq turǵyda engizý josparlanǵan. Iaǵni azamattar shetelge jumysqa ornalasý maqsatynda shyqqany týraly habarlama berip, arnaiy esepke tirkele alady.
Budan bólek, qazaqstandyqtardy shetelde jumysqa ornalastyrýmen ainalysatyn jeke agenttikterdiń tizilimi jasalady. Ony qalyptastyrý jáne júrgizý tártibin memlekettik organdar aiqyndaýy tiis. Agenttikter týraly málimet te migration.enbek.kz portalynda jariialanady. Úkimet bul sharalar arqyly azamattardyń eńbek quqyǵyn qorǵap, eńbek qanaýy men adam saýdasynyń aldyn alýdy kózdep otyr.
Adam saýdasyna qarsy qandai sharalar qabyldanady?
Josparda jeke jumyspen qamtý agenttikteri men jumysqa ornalastyrýǵa kómektesetin deldaldardyń qyzmetin baqylaý da qarastyrylǵan. Qajet bolǵan jaǵdaida olarǵa Kásipkerlik kodeksine sáikes tekserý júrgiziledi. Sonymen qatar 2027 jyldyń birinshi toqsanynda Eńbek jáne Syrtqy ister ministrlikteri shetelge jumys isteýge ketken qazaqstandyqtardy konsýldyq esepke alý júiesin taldap, ony jetildirý jóninde usynystar ázirleýi kerek.
Adam saýdasynyń internet arqyly jasalýyna da erekshe nazar aýdarylady. Memlekettik organdar osyndai qylmystarǵa jol ashýy múmkin jarnamalar men aqparattyq materialdardy baqylaýǵa alady. Tekserý nátijesinde zań buzýshylyq anyqtalsa, mundai aqparatqa qoljetimdilik «Kiberbaqylaý» júiesi arqyly nemese sot sheshimimen shektelýi múmkin.
Buǵan qosa, májbúrli eńbek pen balalar eńbeginiń aldyn alý, jańa týǵan nárestelerdi satý derekterin anyqtaý, seksýaldyq qanaý jáne qaiyrshylyqqa májbúrleý jaǵdailaryna qarsy kúres sharalary júrgiziledi. Adam saýdasynan zardap shekken azamattarǵa da kómek kórsetiledi. Atap aitqanda, olarǵa daǵdarys ortalyqtary arqyly arnaýly áleýmettik qyzmetter usynylady.
Úkimet bekitken 2027–2029 jyldarǵa arnalǵan jospar barlyǵy 32 is-sharany qamtidy.
