Qazaqstannyń eń qart turǵyny retinde tanylǵan Túimegúl Temirbaeva 116 jasynda ómirden ótti. Qaraly habardy Ulytaý oblysynyń ákimdigi málimdedi, dep habarlaidy dalanews.kz.
Ulytaý oblysynyń ákimdigi ǵasyrdan astam ǵumyr keshken Túimegúl Temirbaevanyń qaitys bolýyna bailanysty marqumnyń týǵan-týystary men jaqyndaryna kóńil aitty.
Óńir ákimdiginiń málimetinshe, uzaq jasaǵan keiýana birneshe urpaqtyń ósip-jetilýine kýá bolyp, áýletiniń aqylshysy ári tiregi bolǵan.
15 nemere, 25 shóbere súigen
Túimegúl Temirbaeva ómirinde 15 nemere men 25 shóbere súigen. Ákimdik taratqan kóńil aitý habarlamasynda onyń otbasy men qoǵam ómirindegi orny erekshe atap ótildi.
Marqum uzaq ǵumyrynda tek otbasynyń jaǵdaiyna kóńil bólip qana qoimai, eldegi mańyzdy oqiǵalar men qoǵamdyq ózgeristerdi de nazarda ustaǵan.
Ulytaý oblysynyń ákimdigi Túimegúl Temirbaevanyń ónegeli ómir joly keiingi urpaqqa úlgi bolyp qalatynyn jetkizdi.
"Ǵasyrdan astam ǵumyr keshken ananyń ónegeli ómir joly men jarqyn beinesi urpaqtarynyń jadynda ǵana emes, elimizdiń tarihynda da saqtalatynyna senimdimiz", – delingen ákimdiktiń kóńil aitýynda.
116 jasynda dúnieden ótken Túimegúl Temirbaeva birneshe tarihi kezeńdi bastan ótkerip, bir ǵasyrdan astam ýaqyttyń kýási boldy.
