Reseidiń Daǵystan Respýblikasynda 30 qazanda jumysqa shyǵyp, iz-túzsiz joǵalǵan 34 jastaǵy taksi júrgizýshisi Dinara Alhasovanyń máiiti tabyldy. Áieldiń ólimine qatysty qylmystyq is qozǵalyp, úsh adam kúdikke ilindi, dep habarlaidy dalanews.kz.
Dinara Alhasova Mahachkala qalasynda áielderge arnalǵan taksi qyzmetinde jumys istegen. 30 qazanda ol kezekti tapsyrysty oryndaý úshin úiinen sur tústi Volkswagen Polo kóligimen shyqqan.
Marqumnyń qurbysynyń aitýynsha, sol kúni er adamnan tapsyrys túsken. Jolaýshy sapar úshin joǵary aqy usynǵandyqtan, Dinara tapsyrysty qabyldaýǵa kelisken. Alaida úiinen shyqqannan keiin áiel jaqyndarymen bailanysqa shyqpaǵan.
Joǵalǵan áieldi izdeý barysynda onyń uialy telefony Qyzyliýrt qalasynan tabylǵan. Al 2 qarashada tergeý áreketteri kezinde Mahachkala mańyndaǵy Novyi Hýshet eldi mekeninen onyń jerge kómilgen máiiti anyqtaldy.
IslamNews basylymynyń Mash Gor Telegram arnasyna silteme jasap jazýynsha, qylmys izin jasyrý úshin arnaiy tehnika paidalanylǵan bolýy múmkin. Basylym málimetinde burynǵy kúieýiniń tanysy traktor júrgizýshisine aýladan ájethanaǵa arnalǵan shuńqyr qazdyrǵany aitylady. Keiin sol jerge áieldiń denesi jasyrylyp, shuńqyr qaita kómilgen degen aqparat taraǵan.
Bul jaittardyń egjei-tegjeii tergeý barysynda anyqtalady.
2 qarashada Reseidiń Tergeý komiteti Daǵystanda áieldiń ólimine bailanysty qylmystyq is qozǵalǵanyn jáne eki adamnyń ustalǵanyn habarlady. Keiin Máskeýdiń Domodedovo áýejaiynda osy iske qatysy bar degen kúdikpen taǵy bir áiel ustalǵany belgili boldy.
Daǵystan Ishki ister ministrliginiń baspasóz hatshysy Gaiana Garievanyń málimetinshe, ustalǵan áiel taksi qyzmetine tapsyrys berip, Dinara Alhasovamen sóilesken. Quqyq qorǵaý organdary kúdiktilerdiń árqaisysynyń oqiǵaǵa qatysyn anyqtap jatyr. Qazirgi ýaqytta qylmystyń barlyq mán-jaiyn anyqtaýǵa baǵyttalǵan tergeý amaldary júrgizilýde.
