رەسەيدٸڭ داعىستان رەسپۋبليكاسىندا 30 قازاندا جۇمىسقا شىعىپ, ٸز-تٷزسٸز جوعالعان 34 جاستاعى تاكسي جٷرگٸزۋشٸسٸ دينارا الحاسوۆانىڭ مەيٸتٸ تابىلدى. ەيەلدٸڭ ٶلٸمٸنە قاتىستى قىلمىستىق ٸس قوزعالىپ, ٷش ادام كٷدٸككە ٸلٸندٸ, دەپ حابارلايدى dalanews.kz.
دينارا الحاسوۆا ماحاچكالا قالاسىندا ەيەلدەرگە ارنالعان تاكسي قىزمەتٸندە جۇمىس ٸستەگەن. 30 قازاندا ول كەزەكتٸ تاپسىرىستى ورىنداۋ ٷشٸن ٷيٸنەن سۇر تٷستٸ Volkswagen Polo كٶلٸگٸمەن شىققان.
مارقۇمنىڭ قۇربىسىنىڭ ايتۋىنشا, سول كٷنٸ ەر ادامنان تاپسىرىس تٷسكەن. جولاۋشى ساپار ٷشٸن جوعارى اقى ۇسىنعاندىقتان, دينارا تاپسىرىستى قابىلداۋعا كەلٸسكەن. الايدا ٷيٸنەن شىققاننان كەيٸن ەيەل جاقىندارىمەن بايلانىسقا شىقپاعان.
جوعالعان ەيەلدٸ ٸزدەۋ بارىسىندا ونىڭ ۇيالى تەلەفونى قىزىليۋرت قالاسىنان تابىلعان. ال 2 قاراشادا تەرگەۋ ەرەكەتتەرٸ كەزٸندە ماحاچكالا ماڭىنداعى نوۆىي حۋشەت ەلدٸ مەكەنٸنەن ونىڭ جەرگە كٶمٸلگەن مەيٸتٸ انىقتالدى.
IslamNews باسىلىمىنىڭ Mash Gor Telegram ارناسىنا سٸلتەمە جاساپ جازۋىنشا, قىلمىس ٸزٸن جاسىرۋ ٷشٸن ارنايى تەحنيكا پايدالانىلعان بولۋى مٷمكٸن. باسىلىم مەلٸمەتٸندە بۇرىنعى كٷيەۋٸنٸڭ تانىسى تراكتور جٷرگٸزۋشٸسٸنە اۋلادان ەجەتحاناعا ارنالعان شۇڭقىر قازدىرعانى ايتىلادى. كەيٸن سول جەرگە ەيەلدٸڭ دەنەسٸ جاسىرىلىپ, شۇڭقىر قايتا كٶمٸلگەن دەگەن اقپارات تاراعان.
بۇل جايتتاردىڭ ەگجەي-تەگجەيٸ تەرگەۋ بارىسىندا انىقتالادى.
2 قاراشادا رەسەيدٸڭ تەرگەۋ كوميتەتٸ داعىستاندا ەيەلدٸڭ ٶلٸمٸنە بايلانىستى قىلمىستىق ٸس قوزعالعانىن جەنە ەكٸ ادامنىڭ ۇستالعانىن حابارلادى. كەيٸن مەسكەۋدٸڭ دومودەدوۆو ەۋەجايىندا وسى ٸسكە قاتىسى بار دەگەن كٷدٸكپەن تاعى بٸر ەيەل ۇستالعانى بەلگٸلٸ بولدى.
داعىستان ٸشكٸ ٸستەر مينيسترلٸگٸنٸڭ باسپاسٶز حاتشىسى گايانا گاريەۆانىڭ مەلٸمەتٸنشە, ۇستالعان ەيەل تاكسي قىزمەتٸنە تاپسىرىس بەرٸپ, دينارا الحاسوۆامەن سٶيلەسكەن. قۇقىق قورعاۋ ورگاندارى كٷدٸكتٸلەردٸڭ ەرقايسىسىنىڭ وقيعاعا قاتىسىن انىقتاپ جاتىر. قازٸرگٸ ۋاقىتتا قىلمىستىڭ بارلىق مەن-جايىن انىقتاۋعا باعىتتالعان تەرگەۋ امالدارى جٷرگٸزٸلۋدە.
