BankSentrKredıt 2017 jyly memleketten alǵan kómek aqshany merziminen buryn jabatyn boldy, dep habarlaıdy Dalanews.kz.
Búginderi keıbir bankter Prezıdent Qasym-Jomart Toqaevtyń kezinde memleketten alǵan qomaqty kómek aqshany merziminen buryn qaıtarý týraly ótinishin qabyl alyp, óz jaýapkershilikterin oryndaýda.
Qańtar aıynda Memleket basshysy: "Jekelegen bankter barlyq shyǵyndy ótep úlgerdi, biraq memleketke tıesili qarajatty áli paıdaılanyp júr. Onda da táýekelsiz memlekettik quraldarǵa joǵary paıyzben ınvestısıalaı otyryp, odan olar kepildendirilgen paıdaǵa keńelýde", - dedi.
"Shynynda da, tómen paıyzben alynǵan (0,1-den 4% - ǵa deıin) memleket aqshasyn ekinshi deńgeıdegi bankter qaıtarýǵa esh asyqpaıdy, tipti ókirtip tabys taýyp jatqandaryna qaramastan. Olar 2032-2040 jyldarǵa deıin memleketten sý teginge aqsha aldy. SentrKredıt Banki memlekettik kómek aqshany 2026 jylǵa deıin qaıtarýdy josparlap otyrǵany belgili boldy", dep jazady "Rýchnaıa ekonomıka" Telegram arnasy.
Memlekettik kómek aqshany óz balansynda ustaýshy bankterdiń qatarynan (Alatau City Bank, RBK Bank, Eýrazıalyq bank, Nurbank) bolyp tabylatyn BSK 2017 jyly elimizdegi bank sektorynyń qarjylyq turaqtylyǵyn arttyrý baǵdarlamasy aıasynda 60 mlrd teńgeni jyldyq syıaqy mólshershlemesi 4%-ben 2032 jylǵa deıin alǵan edi.
"Biz memlekettik qarajatty merziminen buryn qaıtarýdy josparlap otyrmyz. Ony 2026 jylǵa deıin aıaqtaımyz", – dedi iri aksıoner Baqytbek Baıseıitov.
Negizinen, atalǵan bank memlekettik kómektiń bir bóligin qaıtaryp úlgergen: 2024 jyldyń sońynda - 20 mlrd teńge, bıyl - taǵy 10 mlrd teńge. Osy jaǵynan alǵanda, bank memleketke taǵy 30 mlrd teńge qaryz.
Shyn máninde, joǵary tabysqa ıe BSK-nyń memleket aldyndaǵy qaryzyn merziminen buryn jabýy kesh bolsa da kútilgen jaǵdaı. 2022 jyldan bastap bank tabysy boıynsha úzdik úsh/úzdik bes bankterdiń qatarynan kórine bildi. Sońǵy úsh jylda BSK jarty trıllıon teńgege jýyq taza paıda tapty: 2024 jyly – 202 mlrd teńge (+50%), 2023 jyly – 135 mlrd teńge (-7%), 2022 jyly – 145 mlrd teńge (+600%). Búginderi BSK 7 trln teńge aktıvter kórsetkishimen boıynsha elimizdegi eń iri úshinshi bank bolyp tabylady. 2025 jyldyń 5 aıyndaǵy bank tabysy 120 mlrd teńgeni qurady.
Buǵan deıin saıtymyzda "Ókirtip tabys tapsa da memleketten alǵan qaryzyn qaıtarmaı júrgen qaı bankter" degen maqala jarıalanǵan bolatyn.
